काठमाडौं । लगानीकर्ताहरुले शुक्रवारको कारोबार बन्द गर्न माग गर्दै नेपाल स्टक एक्सचेन्जका प्रमुख कार्यकारी अधिकृत कृष्ण बहादुर कार्कीलाई हस्ताक्षर संकलन गरेर ज्ञापन पत्र बुझाएका छन् । सरकारले सातामा दुई दिन सार्वजनिक विदा दिने निर्णय गरे संगै नेप्सेले आइतबारको सट्टामा शुक्रवार पनि कारोबार गर्ने निर्णय गरेको थियो । तर सरकारले आइतबार र शनिवार दुई दिन सार्वजनिक विदा दिने निर्णय फिर्ता लिए पनि शुक्रवार पनि २ घण्टा कारोबार खुला गर्ने निर्णय अन्तर्राष्ट्रिय प्रचलन अनुसार नभएको भन्दै बन्द गर्न अनुरोध गरेका हुन् ।
उनिहरुले सातामा ५ दिन मात्रै कारोबार हुनु पर्छ भन्दै हस्ताक्षर संकलन गरेका हुन् । उनिहरुले सिइओ कार्कीलाई संकलित हस्ताक्षर हस्तान्तरण गरेका छन् । पछिल्लो समय शेयर बजार लगातार तल झर्न थाले पनि लगानीकर्ताहरु कारोबार दिन छोट्याउनु पर्ने माग गरिरहेका छन् । बजार बढेको वेलामा कारोबार समय र दिन बढाउनु पर्ने माग राख्ने लगानीकर्ताहरुले बजार घट्दा कारोबार समय र दिनमा जहिले पनि प्रश्न गर्ने गरेका छन् ।
