काठमाडौं । आजभन्दा २१ वर्ष २१ दिन अगाडी विराटनगरको शाखा प्रमुखका रुपमा प्रवेश गरेका नेपाल लाइफका कार्यबहाक प्रमुख कार्यकारी अधिकृत सुशिल कुमार चौधरीले अवकास लिने भएका छन् । राष्ट्रिय बाणिज्य बैंकमा २५ वर्ष काम गरेका चौधरी २०५८ साल असार ११ गते नेपाल लाइफमा भित्रिएका थिए ।
नेपाल लाइफका निवर्तमान प्रमुख कार्यकारी अधिकृत सन्तोष प्रसाईले राजिनामा दिए लगत्तै कम्पनीले चौधरीलाई कार्यबहाक प्रमुख कार्यकारी अधिकृतको जिम्मेवारी दिएको थियो । नेपाल लाइफले प्रमुख कार्यकारी अधिकृतमा प्रविण रमण पराजुलीलाई नियुक्ति गर्ने निर्णय गरे सँगै चौधरीले भने अवकास लिने निर्णय गरेका हुन् ।
व्यवस्थापन विषयमा स्नातकोत्तर गरेका चौधरीले बैंक र बीमा क्षेत्रमा गरी झण्डै पाँच दशक विताए । बैंक र बीमा क्षेत्रमा धेरै लामो समय काम गरिसकेको चौधरीले स्वेच्छिक रुपमा अवकास लिने निर्णय गरेको जानकारी दिए । नेपाल लाइफको दुई दशकको जागिरे जीवनमा चौधरीले आफुलाई सेल्स एण्ड मार्केटिङमा आफुलाई स्थापित गर्न सफल भए । नेपाल लाइफमा सर्वाधिक अनुभवीको सूचिमा पर्ने चौधरीले आफुलाई सेल्स र बीमा पोलिसीमा बिज्ञको रुपमा स्थापित गर्न सफल रहे ।
