काठमाडौं । बीमा कम्पनीहरु गाभिएर प्राप्त गर्ने कर छुटको लागी यही असार मसान्तभित्र आन्तरिक राजश्व विभागमा प्रस्ताव पेश गरिसक्नुपर्ने भएको छ ।
असार महिना समाप्त हुन एक महिना मात्र बाँकी छँदा अधिकांश बीमा कम्पनीहरु अझै पनि गाभ्ने, गाभिनेबारे निर्णय लिन सकेका छैनन् । बीमकका अनुसार अहिले बल बीमा समितिको कोर्टमा रहेको छ । बीमा समितिले बीमकले प्रस्ताव गरे अनुसार पूँजी वृद्धिको योजना अस्वीकृत गरिदिएर बाध्यकारी मर्जर प्रकृयामा लैजान सक्ने संभावनाका कारण अझै पनि बीमकहरु भावी अवस्थाबारे ढुक्क हुन सकेका छैनन् ।
आयकर ऐन २०५८ को संशोधन २०७८ को पृष्ठ ६८ मा दफा ४७ क मा गरिएको संशोधन बमोजिम निःसर्ग हुन चाहने एकै वर्गका निकायले २०७९ असारभित्र आन्तरिक राजश्व विभागमा आशय पत्र बुझाउनुपर्ने र २०८० असार मसान्तसम्ममा निःसर्ग सम्बन्धित सम्पूर्ण कार्य सम्पन्न गरिसक्नुपर्ने प्रावधान तोकेको छ ।
बीमा समितिले मर्जर पछिको पूँजीगत लाभकर छुट, मर्जरपछि पहिलो दुई वर्ष प्राप्त हुने लाभांशमा कर नलाग्ने र कर्मचारी अवकाशवापत दिइने थप एकमुष्ठ अवकाश रकममा लाग्ने करमा पचास प्रतिशत छुटको लाभ लिनको लागी असार मसान्तभित्र आन्तरिक राजश्व विभागमा निवेदन दिन आग्रह गरेको छ ।
बीमा समितिले बीमाकको पूंजी वृद्धि गरे पछि हाल सम्म निर्जिवनमा हिमालयन जनरल इन्स्योरेन्स कम्पनी र एभरेष्ट इन्स्योरेन्स कम्पनी मर्जरको अन्तिम चरणमा छन् भने जीवन बीमा कम्पनीमा प्राइम लाइफ, गुराँस लाइफ र युनियन लाइफ इन्स्योरेन्स कम्पनी बीच मर्जरको सम्झौता भएको छ।
(यसअघि मर्जर पछि प्राप्त हुने लाभबारे बीमा समितिले ढाँट्यो भन्ने शीर्षकमा भूलवश गलत जानकारी समावेश भएकोमा क्षमाप्रार्थी छौं-सम्पादक)
