जीवन बीमा कम्पनीहरुले ८४ करोड ५२ लाख रुपैयाँ अभिकर्ता कर्जा प्रवाह गरेका छन् । बीमा समितिको तथ्यांक अनुसार २०७४/२०७५ को असारमसान्तसम्ममा १३ जीवन बीमा कम्पनीहरुले उक्त रकम बराबरको कर्जा प्रवाह गरेका हुन् ।
बीमा कम्पनीहरूले अभिकर्ताको लागि समय समयमा विभिन्न खालका ऋण तथा सापटी योजना सञ्चालन गर्दै आएका छन् । जसअन्तर्गत अधिकांश कम्पनीले घर, कार, मोटरसाइकल, ल्यापटप, कम्प्यूटर र मोबाइल कर्जाका साथै नगद कर्जा समेत प्रदान गर्दै आएका छन् ।
जीवन बीमा कम्पनीमध्ये नेपाल लाइफले सबैभन्दा धेरै ३७ करोड ७७ लाख रुपैयाँ अभिकर्ता कर्जा प्रवाह गरेको छ । लाईफ इन्स्योरेन्स कर्पोरेशनस (नेपाल) ले २८ करोड ७० लाख रुपैयाँ कर्जा प्रवाह गरेका छन् । नेशनल लाईफ इन्स्योरेन्स कम्पनीले ७ करोड ४६ लाख रुपैयाँ कर्जा प्रवाह गरेको छ भने सूर्या लाईफ इन्स्योरेन्स कम्पनीले ४ करोड ९२ लाख रुपैयाँ कर्जा प्रवाह गरेको छ ।
बीमा ऐनमा अभिकर्तालाई कर्जा प्रदान गर्न सकिने व्यवस्था छ । तर, कम्पनीहरुले जथाभावी कर्जा प्रवाह गर्ने गरेको समितिले बताएको छ ।
अभिकर्ता कर्जा असुलीमा समस्या
बीमा कम्पनीहरुले आफनो विनियमावलीमा भएको व्यवस्था अनुसार अभिकर्ताको कार्य सम्पादनको आधारमा कर्जा उपलब्ध गराउँन पाउँछन् । तर, कम्पनीहरुले अभिकर्ताको कार्य मूल्यांकन नगरी कर्जा उपलब्ध गराउँने हुँदा कर्जा असुलीमा समस्या हुने गरेको समितिले बताएको छ । कर्जा लिएका अभिकर्ताहरु सम्पर्कमा नआउँने, एउटा कम्पनी छोडेर अर्को कम्पनीमा जाने हुँदा कर्जा असुलीमा समस्या भएको हो ।
बीमा कम्पनीहरुले बजारको दर अनुसार कम्तिमा पनि ८ देखि १२ प्रतिशत ब्याजदरमा अभिकर्तालाई कर्जा उपलब्ध गराउँदै आएका छन् । कम्पनीहरुले आफनो लगानीको विविधिकरणका लागी पनि अभिकर्तालाई कर्जा वितरण गर्ने गरेको समितिले बताएको छ । कम्पनीका लागी अभिकर्ता कर्जा सुरक्षित लगानी भए पनि आधार जथाभावी कर्जा प्रवाह गर्दा समस्या हुने गरेको हो ।
