काठमाडौं । प्रोभिजनिङका कारण युनियन लाइफ इन्स्योरेन्स कम्पनीको मुनाफामा भारि गिरावट आएको छ । कम्पनीले चालु आर्थिक वर्ष २०७८/७९ को तेस्रो त्रैमाशिक अवधिमा २ करोड ७२ लाख रुपैया मुनाफा आर्जन गरेको छ । जवकी गत वर्षको यहि अवधिमा कम्पनीको मुनाफा ८ करोड २५ लाख रुपैयाँ थियो । यस त्रैमाशिक अवधिमा ११ करोड १८ लाख रुपैयाँ प्रोभिजनिङ गर्नु परेको छ ।
यस वर्ष खुद बीमा शुल्क आर्जन १८ प्रतिशतले सुधार देखिएको छ । कम्पनीले तेस्रो त्रैमाशिक अवधिमा ५ अर्ब ९९ करोड रुपैयाँ आर्जन गरेको छ । गत वर्षको यहि अवधिमा ५ अर्ब ५ करोड रुपैयाँ थियो । खुद दाबी भुक्तानी ६२ प्रतिशतले बढेको छ । कम्पनीले समिक्षा अवधिमा २ अर्ब ३५ करोड रुपैयाँको खुद दाबी भुक्तानी गरेको छ । जवकी गत वर्षको यहि अवधिमा एक अर्ब ४५ करोड रुपैयाँ थियो ।
बीमा शुल्क आर्जनमा उल्लेख्य सुधार सँगै जीवन बीमा कोष ४९ प्रतिशतले बढाउन सफल भएको छ । कम्पनीको जीवन बीमा कोषमा १० अर्ब ४२ करोड रुपैयाँ जम्मा भएको छ । गत वर्षको यहि अवधिमा जम्मा ६ अर्ब ९० करोड रुपैयाँ मात्रै थियो ।
चुक्ता पूँजी २ अर्ब १५ करोड रुपैयाँ रहेको युनियन लाइफको जगेडा कोषमा एक अर्ब ९ करोड रुपैयाँ जम्मा भएको छ । कम्पनीले दीर्घकालिन क्षेत्रमा मात्रै १० अर्ब ४२ करोड रुपैयाँ लगानी गरेको छ । त्यस्तै बीमा लेख धितोमा राखेर ९५ करोड रुपैयाँ लगानी गरेको छ । यस वर्ष अभिकर्ताले प्राप्त गर्ने कमिशन भने घटेको छ । अभिकर्ताले ९३ करोड ७४ लाख रुपैयाँ बुझेका छन् । गत वर्षको यहि अवधिमा उनिहरुले ९६ करोड रुपैयाँ बुझेका थिए ।
