काठमाडौं । मेट लाइफ इन्स्योरेन्स कम्पनीले गत आर्थिक वर्ष २०७७/७८ को बोनस दर घोषणा गर्दा ९ वटा जीवन बीमा कम्पनीहरुले बल्ल प्रकृयाँ अगाडी बढाएका छन् । बीमा समितिका अनुसार हालसम्म तीन वटा कम्पनीले एक्चुरीअल मूल्याङ्कनको सैद्धान्तिक स्वीकृतिका लागि बीमा समितिमा पेश गरेका छन् । त्यस्तै ६ वटा कम्पनीहरुले भने सैद्धान्तिक स्वीकृति पाइसकेका छन् ।
नियम अनुसार एक्चुरियल मूल्याङ्कनका लागि सैद्धान्तिक स्वीकृति पाएको ३० दिनमा एक्चुरियल मूल्याङ्क प्रतिवेदन पेश गर्नु पर्ने हुन्छ । बीमा समितिका अनुसार नेशनल लाइफ इन्स्योरेन्स कम्पनी, एशियन लाइफ इन्स्योरेन्स कम्पनी, सूर्या लाइफ इन्स्योरेन्स कम्पनीले सैद्धान्तिक स्वीकृतिका लागि समितिमा पेश गरेका छन् ।
त्यस्तै समितिबाट भ्यालुएसनका लागि लाइफ इन्स्योरेन्स कर्पोरेसन, रिलायन्स लाइफ इन्स्योरेन्स, सिटिजन लाइफ इन्स्योरेन्स कम्पनी, प्रभु लाइफ इन्स्योरेन्स कम्पनी, ज्योति लाइफ इन्स्योरेन्स कम्पनी, महालक्ष्मी लाइफ इन्स्योरेन्स कम्पनीले सैद्धान्तिक स्वीकृति पाइसकेका छन् ।
अघिल्लो आर्थिक वर्षको हकमा भने राष्ट्रिय बीमा संस्थान बाहेक सम्पुर्ण कम्पनीहरुले एक्चुरियल मूल्याङ्कन गरिसकेका छन् । कतिपय बीमा कम्पनीले अघिल्लो आर्थिक वर्ष २०७६/७७ कै साधारणसभा गर्न बाँकी रहेकोले गत आर्थिक वर्षको एक्चुरियल मूल्याङ्कन कार्य अगाडी बढाउन सकिरहेका छैनन् ।
बीमा समितिका अनुसार अघिल्लो आर्थिक वर्षको साधारणसभा सम्पन्न भएको एक हप्ता भित्रै ति कम्पनीहरुले सैद्धान्तिक स्वीकृतिका लागि बीमा समितिमा पेश गर्ने गरेका छन् । समितिले सैद्धान्तिक स्वीकृति दिए पछि कम्पनीहरुले ६० दिन भित्रमा भ्यालुएसन रिपोर्ट पेश गर्नु पर्छ ।
हालसम्म १० वटा कम्पनीहरुले मात्रै एक्चुरियल मूल्याङ्कनको प्रकृयाँ अगाडी बढाएका छन् । अझै ९ वटा कम्पनीहरुको अत्तोपत्तो छैन । अघिल्लो आर्थिक वर्षको साधारणसभा सम्पन्न गरे पछि मात्रै एक्चुरियल मूल्याङ्कन गर्न नपाइने भएकाले पनि उक्त कम्पनीहरुले प्रकृयाँ अगाडी बढाउन नसकेका हुन् ।
नेपाल लाइफले अघिल्लो आर्थिक वर्ष २०७६/७७ को साधारणसभा यहि चैत २१ गते सम्पन्न गर्दैछ । त्यस पछि मात्रै कम्पनीले गत आर्थिक वर्षको एक्चुरियल मूल्याङ्कनको सैद्धान्तिक स्वीकृतिका लागि बीमा समितिमा पेश गर्नेछ ।
समितिका अनुसार साधारणसभा सम्पन्न भएको एक सातामै गत आर्थिक वर्षको एक्चुरियल मूल्याङ्कनका लागि सैद्धान्तिक स्वीकृति लिने ट्रेण्ड रहेको छ । बीमा समितिले कम्पनीहरुलाई समयमै साधारणसभा गर्न दवाव दिदै आएको छ । समितिले समयमा साधारणसभा नगर्ने केहि कम्पनीलाई कारबाही पनि गरेको थियो । गत वर्षको लागि लगभग सबै कम्पनीहरुले एक्चुरियल प्रतिवेदन तयार पारेर बीमा समितिमा पेश गरिसकेका छन् । अहिले राष्ट्रिय बीमा संस्थानको मात्रै विगत १० वर्षदेखिको एक्चुरियल मूल्याङ्कन तयार हुन सकेको छैन ।
