काठमाडौं । नयाँ सारथी लघुवित्त वित्तीय संस्थाले लाभांश घोषणा गरेको छ । संस्थाको फागुन १० गते बसेको सञ्चालक समितिको बैठकले आर्थिक वर्ष २०७७/७८ सम्मको सञ्चित मुनाफाबाट १९ प्रतिशत बोनस शेयरको प्रस्ताव गरेको छ ।
नयाँ सारथी लघुवित्त वित्तीय संस्था साविकका सारथी लघुवित्त वित्तीय संस्था र नयाँ नेपाल लघुवित्त वित्तीय संस्था एक आपसमा गाभिएका थिए । मर्जर पछि गत असोज ५ गतेदेखि एकिकृत कारोबार भएको थियो । नियम अनुसार उक्त बोनस शेयरमा लाग्ने कर प्रयोजनका लागि एक प्रतिशत नगद लाभांशको पनि प्रस्ताव गरिएको छ ।
हाल संस्थाको चुक्ता पूँजी २५ करोड ४९ लाख रुपैयाँ रहेको छ । प्रस्तावित बोनस शेयर वितरण पछि संस्थाको चुक्ता पूँजी ३० करोड ३ लाख रुपैयाँ नाघ्नेछ । उक्त लाभांश नेपाल राष्ट्र बैंकबाट स्वीकृत भए पछि मात्रै साधारणसभामा पेश गर्न पाउनेछ । साधारणसभाले पारित गरेपछि बल्ल शेयरधनीले प्राप्त गर्ने छन् ।
