काठमाडौं । रिलायन्स लाइफ इन्स्योरेन्सबाट गत साता मात्र कार्यकाल सकेर बाहिरिएका प्रविण रमण पराजुलीले आइतबारबाट नेपाल लाइफ इन्स्योरेन्समा कार्यभार सम्हालेका छन् । पराजुलीले बरिष्ठ नायब प्रमुख कार्यकारी अधिकृत पदमा नियुक्ति पाएका हुन् । तत्कालीन प्रमुख कार्यकारी अधिकृत सन्तोष प्रसाईंले चार वर्षे कार्यकालको पहिलो आठ महिना नबित्दै राजीनामा गरेपछि नेपाल लाइफमा प्रमुख कार्यकारी अधिकृत पद रिक्त रहेको छ ।
बीमकको संस्थागत सुशासन निर्देशिका २०७५ ले कुनै एउटा बीमकको प्रमुख कार्यकारी अधिकृतले राजीनामा दिएको वा कार्यकाल सकेर बाहिरिएको छ महिना पुरा नभएसम्म अर्को कुनै बीमा कम्पनीमा प्रमुख कार्यकारी अधिकृत पदमा नियुक्त हुन रोक लगाएको छ । त्यसैले निर्देशिकाको यो प्रावधान छल्न पराजुलीले एक तह घटुवा भएर नेपाल लाइफमा जागिर सुरु गरेका छन् ।
सुशासन निर्देशिकाको पहिलो संशोधन २०७८ ले कुनै पनि बीमकको प्रमुख कार्यकारी अधिकृत पद तीन महिनाभन्दा लामो समयसम्म रिक्त राख्न नहुने प्रावधान थप गरेको छ । यो व्यवस्था सँगै पराजुली अवको लामो समयसम्म बरिष्ठ नायब प्रमुख कार्यकारी अधिकृत पदमै खुम्चिनु पर्ने भएको छ । नेपाल लाइफले अवको ६ महिना पराजुलीलाई सिइओमा नियुक्ति गर्न पाउदैन । अर्को तर्फ संसोधित संस्थागत सुशासन निर्देशिका २०७८ अनुसार तीन महिना भित्रमा अर्को सिइओ नियुक्त गरिसक्नु पर्छ । त्यसैले अव नियुक्त हुने प्रमुख कार्यकारी अधिकृतको कार्यकाल सकिए पछि मात्रै पराजुली नेपाल लाइफको प्रमुख कार्यकारी अधिकृतका लागि योग्य हुन्छन् ।
पछिल्लो प्रावधानले नेपाल लाइफ इन्स्योरेन्स, रिलायन्स लाइफ इन्स्योरेन्स र नेपाल इन्स्योरेन्सलाई प्रमुख कार्यकारी अधिकृत नियुक्ति गर्ने दवाव सिर्जना गरेको छ । उनिहरुले कम्तिमा पनि अवको तीन महिना भित्रमा प्रमुख कार्यकारी अधिकृत नियुक्त गरिसक्नु पर्छ ।
