काठमाडौं । गरिमा विकास बैंक लिमिटेडले निष्काशन गरेको ऋणपत्रमा आवेदन दिने समयावधि थप भएको छ । कम्पनीले मंसिर १६ गतेदेखि वार्षिक ८ दशमलव ७५ प्रतिशत ब्याजदरको ऋणपत्र निष्काशन गरेको हो । उक्त ऋणपत्रमा आजसम्म आवेदन दिने अवधि रहेको भएपनि उक्त ऋणपत्रमा पूर्ण आवेदन नपरेकोले अब ढिलो अवािध पुस १ गतेसम्म आवेदन दिन सकिने बैंकले जनाएको छ ।
बैंकले ७ वर्षे अवधिको ‘८ दशमलव ७५ प्रतिशत गरिमा डिबेन्चर २०८५’ निष्काशन तथा विक्री खुला गर्न लागेको हो । आवेदकले न्यूनतम २५ कित्तादेखि अधिकतम १ लाख कित्तासम्मका लागि आवेदन दिन सक्नेछन् ।
कम्पनीले प्रतिकित्ता १ हजार रुपैयाँ अंकित दरका १ अर्ब रुपैयाँ बराबरको १० लाख कित्ता ऋणपत्र निष्काशन गर्न लागेको हो । जसमध्ये ४० करोड रुपैयाँ बराबरको ४ लाख कित्ता सर्वसाधारणलाई विक्री गरिनेछ भने बाँकी ६० करोड रुपैयाँ बराबरको ६ लाख कित्ता व्यक्तिगत तवरबाट विक्री गर्ने बैंकले जनाएको छ । सर्वसाधारणका लागि विक्री गरिने ऋणपत्रमध्ये ५ प्रतिशत अर्थात् २० हजार कित्ता सामूहिक लगानी कोषका लागि छुट्याइएको छ ।
कम्पनीलाई इक्रा नेपालले मध्यम कर्जा जोखिम जनाउने ‘इक्राएनपी आईआर त्रिपल बी माइनस’ रेटिङ प्रदान गरेको छ । उक्त रेटिङ प्राप्त गर्ने संस्थाहरुलाई समयमा नै वित्तीय दायित्व पूरा गर्ने सम्बन्धमा मध्यम मात्रामा सुरक्षित मानिन्छ ।
उक्त ऋणपत्रमा आवेदकहरुले नेपाल धितोपत्र बोर्डबाट इजजातपत्र प्राप्त आस्वा सेवामा सहभागी बैंक तथा वित्तीय संस्था र तीनका शाखा कार्यालयबाट आवेदन दिन सकिने बैंकले जनाएको छ ।
