काठमाडौं । नेपाल लाइफ इन्स्योरेन्स कम्पनीको मुनाफामा भारि गिरावट आएको छ । चालु आर्थिक वर्षको पहिलो त्रैमाशिक अवधिमा १८ करोड ०८ लाख रुपैयाँको नोक्सानी बापतको व्यवस्था गर्नु पर्दा मुनाफामा ७० लाख ३३ हजार रुपैयाँमा सिमित भएको छ । गत आर्थिक वर्षको यहि अवधिमा कम्पनीको मुनाफा २२ करोड ९० लाख रुपैयाँ थियो । कम्पनीको मुनाफा एक्चुरिअल प्रतिवेदन पछि परिवर्तन हुने भएकाले लेखापरिक्षण पछि बढेर आउने गरेको पाइन्छ ।
कम्पनीले चालु आर्थिक वर्ष २०७८/७९ को पहिलो त्रैमाशिक अवधिमा ९.१९ प्रतिशतले खुद बीमा शुल्क आर्जन गर्न सफल भएको छ । तीन महिनाको अवधिमा ९ अर्ब ७४ करोड रुपैयाँ बीमा शुल्क आर्जन गरेको छ । गत वर्षको यहि अवधिमा भने ८ अर्ब ९२ करोड रुपैयाँ थियो ।
जीवन बीमा कोष २५.२१ प्रतिशतले बढाउन सफल भएको छ । कम्पनीको जीवन बीमा कोषमा एक खर्ब १८ अर्ब रुपैयाँ जम्मा भएको छ । जीवन बीमा कम्पनीहरु मध्ये सर्वाधिक जीवन बीमा कोष रहेको नेपाल लाइफले दिर्घकालिन लगानी मात्रै ५० अर्ब भन्दा माथि छ । बीमा लेख धितोमा राखेर मात्रै २० अर्ब ५७ करोड रुपैयाँ लगानी गरेको छ । अल्पकालिन लगानी तथा कर्जा भने ५४ अर्ब रुपैयाँ रहेको छ ।
कम्पनीको चुक्ता पूँजी ५ अर्ब ४९ करोड रुपैयाँबाट ७ अर्ब १९ करोड रुपैयाँ रहेको छ भने जगेडा कोषमा ८६ करोड ९६ लाख रुपैयाँ रहेको छ । प्रोभिजनिङका कारण मुनाफामा खुम्चिएको नेपाल लाइफको प्रतिशेयर आम्दानी भने एक रुपैयाँ भन्दा कम छ । यस अवधिमा अभिकर्ताले ९९ करोड ६१ लाख रुपैयाँ कमिशन प्राप्त गरेका छन् ।
