काठमाडौं। कोभिड महामारीको कारण आर्थिकरुपमा नराम्ररी थलिएका गण्डकी प्रदेशको पर्यटन व्यवसायी पुरानै अवस्थामा फर्किन दुई वर्षभन्दा बढी लाग्ने भएको छ । नेपाल राष्ट्र बैंकले गण्डकी प्रदेशको आर्थिक अवस्थाबारे गरेको सर्वेक्षणको क्रममा सहभागी पर्यटन व्यवसायीहरुले आफ्नो व्यवसाय सामान्य अवस्थामा फर्कन २ वर्षभन्दा बढी लाग्ने अनुमान गरेका हुन् ।
कोभिड महामारीको पहिलो लहरका कारण गत आर्थिक वर्षमा पर्यटन व्यवसायीले ठूलो आर्थिक नोक्सानी व्यहोर्नु परेको छ । नेपाल राष्ट्र बैंकले गरेको सर्वेक्षणमा सहभागी पर्यटन व्यवसायीमध्ये ३३.६ प्रतिशतले कोरोना महामारीका कारण भएको बन्दाबन्दीको असरले गर्दा १० लाखदेखि २० लाख रुपैयाँसम्म सम्पत्ति गुमाएका छन् ।
पर्यटन सेवा क्षेत्रका होटल, टुर अपरेटरलगायतसँग आवद्ध कामदार कर्मचारीले दिएको जानकारीका अनुसार कोभिड महामारीको पहिलो लहरले पर्यटन क्षेत्रका ५३ प्रतिशत कामदार कर्मचारी रोजगारविहीन भएका छन् ।
