काठमाडौं । दुई महिना कार्यकाल बाँकी हुँदै गुराँस लाइफका प्रमुख कार्यकारी अधिकृत नारायण कुमार भट्टराईले राजिनामा दिएका छन् । कम्पनीले आफुलाई थाहै नदिइ डिसिइओ नियुक्ति गरेको भन्दै उनले कार्यकाल बाँकी छदै राजिनामा दिएका हुन् ।
कम्पनी सञ्चालकले एलआईसी नेपालका बाग्मति प्रदेश प्रमुख स्मृति राज कंडेललाई डिसिइओमा नियुक्त गरेको छ । कंडेलको नियुक्ति प्रकृयाँलाई लिएर भट्टराईले आपत्ती जनाउदै राजिनामा दिएका हुन् ।
गुराँस लाइफले २०७४ मंसिरमा भट्टराईलाई चार वर्षका लागि प्रमुख कार्यकारी अधिकृतमा नियुक्त गरेको थियो । एलआईसी नेपालबाट बीमा क्षेत्रमा करिअर सुरु गरेका भट्टराईले एलआईसीमा मात्रै ९ वर्ष काम गरे । २०६८ सालमा एलआईसीबाट गुराँस लाइफमा सहायक महाप्रवन्धकमा भित्रिएका थिए । सहायक महाप्रवन्धक, नायव महाप्रवन्धक हुँदै प्रमुख कार्यकारी अधिकृत भएका भट्टराई अन्तत बाहिरिएका छन् ।
यस पटक पनि गुराँसले एलआईसीकै कर्मचारीलाई भित्र्याएको छ । दाङका कंडेल सन् २००३ देखि एलआईसी नेपालमा आवद्ध थिए । एलआईसीमा १८ वर्ष विताएका कंडेल मार्केटिङमा पोख्त छन् ।
