काठमाडौं । युनिलिभर नेपालले गत आर्थिक वर्षको मुनाफाबाट ६५० प्रतिशत नगद लाभांश घोषणा गरेको छ । कम्पनीको सञ्चालक समितिले गत आर्थिक वर्षको मुनाफाबाट ६० करोड १२ लाख ५० हजार रुपैयाँ लाभांश दिने प्रस्ताव गरेको छ ।
कम्पनीको चुक्ता पूँजी ९ करोड २५ लाख रुपैयाँ रहेको छ । कम्पनीले अघिल्लो आर्थिक वर्षको मुनाफाबाट १०० प्रतिशत नगद लाभांश दिएको थियो । कोभिड १९ का कारण व्यवसायमा आएको मन्दी सँगै लाभांश दर पनि घटेको थियो । तर यस पटक भने कम्पनीले साविकको जस्तो लाभांश दर बढाएको छ । लाभांशदर घटेकोले गएको वर्ष कम्पनीको शेयर मूल्यमा भारी गिरावट आएको थियो । सोमबारको बजार मूल्य अनुसार १९ हजार ५०० रुपैयाँ रहेको छ । दोस्रो बजारमा सूचिकृत कम्पनीहरु मध्ये सबैभन्दा महंगो युनिलिभरले विगतका १० वर्षमा ७ अर्ब २१ करोड रुपैयाँ नगद लाभांश वितरण गरेको छ ।
कम्पनीले यस पटक घोषणा गरेको लाभांश असोज २४ गतेसम्म कायम शेयरधनीहरुले प्राप्त गर्न सक्ने छन् । कम्पनीले असोज २५ गते बुक क्लोज गर्ने जनाएको छ । साधारणसभाले उक्त लाभांश पारित गरे पछि मात्रै शेयरधनीहरुले प्राप्त गर्न सक्ने छन् । कम्पनीले डिम्याट गरेका शेयरधनीहरुलाई मात्रै घोषित लाभांश बैंक खातामा पठाउने जनाएको छ । डिम्याट गरेकालाई पनि आफ्नो शेयर रजिष्ट्रारकोमा गएर बैंक खाता अद्यावधिक गर्न सूचना जारी गरेको छ ।
