काठमाडौं । बुधबार नेप्से सूचकमा सामान्य सुधार देखियो । सूचकमा सामान्य सुधार देखिए पनि आज सबैभन्दा धेरै जलविद्युत क्षेत्रका कम्पनीहरुले सर्वाधिक धेरै कमाएका छन् । केहि समयदेखि जलविद्युत क्षेत्रका कम्पनीमा खासै सुधार हुन सकेको थिएन । नयाँ गठन भएको सरकारले नेपाल विद्युत प्राधिकरण वा विद्युत नियमन आयोग कहि न काँही कुलमान घिसिङलाई नियुक्त गर्ने हल्लाले जलविद्युत क्षेत्रका कम्पनीमा सर्वाधिक सुधार देखिएको हो ।
सूचक १.०१ अंकले सुधार हुँदा हिमालयन पावर पार्टनरको शेयर मूल्य ८.१० प्रतिशतले बढ्यो । शेयरधनीहरुले प्रतिकित्ता ३४ रुपैयाँले कमाएका छन् । कम्पनी शेयर मूल्य बढेर ४५४ रुपैयाँ पुगेको छ ।
त्यस्तै नेपाल फाइनान्सको शेयर मूल्य ७.७१ प्रतिशतले सुधार भएको छ । कालिका पावर कम्पनीको पनि शेयर मूल्य ७.११ प्रतिशतले बढेको छ । नेपाल विद्युत प्राधिकरणले नै प्रवर्द्धन गरेको रसुवागढीको ५.९५ प्रतिशत र सान्जेनको ५.७३ प्रतिशतले बढेको छ ।
ङादी पावरको ५.६८ प्रतिशत, मल्टिपर्पोज फाइनान्सको ५.३४ प्रतिशत, सिनर्जी पावर र रैराङ हाइड्रोपावरको ५.०८ प्रतिशत र हिमाल दोलखाको ४.६९ प्रतिशतले सुधार भएको छ ।
