काठमाडौं । सरकार परिवर्तन पछि लगानीकर्ता अलमलमा परेका छन् । नेपाली कांग्रेसको सरकार गठन भए पनि अर्थमन्त्रीमा माओवादीको तर्फबाट जनार्दन शर्मा नियुक्त भए सँगै लगानीकर्तामा केहि संका पैदा भएको छ ।
संकाकै आवरणमा नेप्से सूचक एक दशमलब ०१ प्रतिशतले सुधार भए पनि सेन्सेटिभ इन्डेक्स सून्य दशमलब १४ प्रतिशतले घटेको छ । सर्वोच्च अदालतले संसद विघटनलाई उल्टाएर शेर बहादुर देउवालाई प्रधानमन्त्रीमा नियुक्त गर्न परमादेश जारी गरे सँगै मंगलबार नै देउवा प्रधामन्त्रीमा नियुक्त भएका छन् ।
अर्थमन्त्री प्रति अविस्वास पैदा हुँदा कारोबार खुलेको केहि समय घटेको नेप्से सूचक पुनः बाउन्स ब्याक भएर केहि समालिएको थियो । बुधबार होटल, हाइड्रोपावर, फाइनान्स, म्युचुअल फण्ड र इन्भेष्टमेन्टको सूचकमा सुधार देखिएको छ भने बाँकी सूचक घटेका छन् ।
बुधबार २१४ वटा कम्पनीको शेयर कारोबार हुँदा ८१ वटा कम्पनीको मूल्य बढेको छ । कारोबार रकम ५ अर्ब ६५ करोड रुपैयाँमा सिमित भएको छ । सबैभन्दा धेरै हिमालयन पावर पार्टनरका शेयरधनीले कमाएका छन् । कम्पनीको शेयर मूल्य ८.१० प्रतिशतले बृद्धि भएको छ । त्यस्तै केहि म्युअल फण्डका इकाइधनीहरुले गुमाएका छन् । तर सर्वाधिक धेरै इकाइ कारोबार संख्यालाई हेर्ने हो भने पनि म्युचुअल फण्डकै अग्रता रहेको छ ।
