काठमाडौं । राजधानीमै केवलकार सञ्चालन गर्दै आएको चन्द्रागिरी हिल्स नामक कम्पनीले जारी गर्न लागेको १५ लाख कित्ता भन्दा बढि आईपिओ आज विहान १०ः०० बजेदेखि बिक्री खुल्ला हुँदैछ ।
चन्द्रागिरी हिल्स कम्पनीले प्रति कित्ता एक सय रुपैयाँ अंकित मूल्यको दरले कुल १५ लाख ३४ हजार ९१ कित्ता शेयरका लागि आवेदन खुल्ला गरेको हो । सो शेयर मध्ये कम्पनीमा कार्यरत कर्मचारीहरुको लागि ४ प्रतिशत अर्थात ६१ हजार ३६४ कित्ता, सामूहिक लगानी कोषहरुको लागि ५ प्रतिशत अर्थात ७६ हजार ७०५ कित्ता शेयर छुट्याएर बाँकी रहेको कुल १३ लाख ९६ हजार २२ कित्ता शेयर सर्वसाधारणलाई वितरण गरिने कम्पनीले जनाएको छ ।
चन्द्रागिरी हिल्सको आईपिओमा न्यूनतम् १० कित्ताको दरले भाग जाने भन्दा कैयौं गुणा बढि आवेदन पर्ने हुँदा सर्वसाधारणले गोलाप्रथाको माध्यमबाट १० कित्ताको दरले शेयर पाउने देखिएको छ । आजदेखि आवेदन खुल्ला गरिएको आईपिओमा न्यूनतम १० कित्तादेखि अधिकतम १३ हजार ९६० कित्तासम्म आवेदन दिन सकिने व्यवस्था रहेको छ ।
आजबाट आवेदन लिन सुरु गरिएको चन्द्रागिरी हिल्सको आईपीओ निष्काशन छिटोमा पुस २८ गते बन्द हुने चन्द्रागिरी हिल्सको शेयर निष्काशन तथा बिक्री प्रबन्धक ग्लोबल आइएमई क्यापिटलले जनाएको छ । कम्पनीले पहिलो चरणमा स्थानीय सर्वसाधारणको लागि आईपिओ निष्काशन गरिसकेको छ । आईपीओ बाँडफाँड पश्चात कम्पनीको कूल चुक्ता पुँजि एक अर्ब ५३ करोड ४० लाख ९१ हजार रुपैयाँ पुग्नेछ ।
कसरी भर्ने आईपिओ ?
अनलाईनबाटै आईपिओ भर्न सकिन्छ । सबै सर्वसाधारणले आवेदन दिन पाउने हुँदा बैंक खाता भएका सबै नेपाली नागरिकहरुले उक्त आईपिओमा आवेदन भर्न पाउनेछन् । बैंक खाताको अतिरिक्त शेयर भण्डारणको लागि क्यापिटल मार्केट कम्पनीमा डिम्याट खाता खोल्नु अनिवार्य छ । डिम्याट खाता भएका जो सुकैले अनलाईन आवेदनका लागि मेरो शेयरको युजर आईडी तथा पासवर्ड लिएर (जुन डिम्याट खाता खोल्ने बेलामा सँगै पनि लिन सकिन्छ ।) आवेदन दिन सकिन्छ ।
मेरो शेयरको अतिरिक्त सि–आस्वा सदस्य बैंक तथा वित्तीय संस्थामा गएर पनि डिम्याट एकाउन्ट सहित आवेदन दिन सकिन्छ ।
