काठमाडौं । बीमा क्षेत्रमा प्रभावकारी नियमन र बीमाको दायरा विस्तार गर्ने उद्देश्यले सरकार संसदमा पेश गरेको बीमा ऐन २०७५ को मस्यौदा संसदबाट पारित नभई मौजुदा संसद नै अन्त्य भएको छ । संसद अन्त्यसँगै बीमा क्षेत्रको बृहत्तर नियमनको लागि गठन गर्न लागिएको बीमा प्राधिकरण समेत पछाडि धकेलिएको छ ।
कुनै कारणबाट संसद पुनस्र्थापना भएको अवस्थामा बाहेक अब नयाँ संसद गठन भएपछि मात्रै बीमा विधेयक पारित हुने र हाल प्रचलनमै रहेको बीमा ऐन २०४८ ले बीमाको नियमन हुने भएको छ । बीमा समितिको स्थानमा शक्तिशाली बीमा प्राधिकरण गठनको प्रस्ताव गरिएकोमा अब केही समय लम्बिने भएको छ । बीमा विधेयक पारित नहुँदा नेपाली बीमा क्षेत्रले यसै वर्षदेखि बीमा प्राधिकरण गठन गरी प्रभावकारी बीमा नियमन हुने विश्वासमाथि घात हुन पुगेको छ ।
बीमा विधेयक हाल अर्थ समितिमा छलफलको चरणमा रहेको छ । विषयगत समितिमा अन्तिम छलफलको चरणमा रहेको बीमा विधेयक निर्धारित मितिमा निर्वाचन सम्पन्न भएको अवस्थामा अर्को आर्थिक वर्षमा मात्रै पारित हुन सक्ने देखिएको छ ।
