काठमाडौं । सूर्या लाइफ इन्स्योरेन्स कम्पनीले १३.३६ प्रतिशत लाभांश घोषणा गरेको छ । कम्पनीको कार्तिक १३ गते बसेको सञ्चालक समितिको बैठकले आर्थिक वर्ष २०७६/७७ को मुनाफाबाट चुक्ता पूँजीको १२.७० प्रतिशत बोनश शेयर र बोनश शेयरमा लाग्ने कर प्रयोजनका लागि ०.६६८४ प्रतिशत नगद लाभांश सहित जम्मा १३.३६८५ प्रतिशत लाभांशको प्रस्ताव गरेको छ ।
कम्पनीले प्रस्ताव गरेको लाभांश नियामक निकाय बीमा समितिले स्वीकृत दिए पछि मात्रै आगामी वार्षिक साधारणसभामा पेश गर्न सक्ने छ । साधारणसभाले प्रस्तावित लाभांश पारित गरेपछि मात्रै शेयरधनीहरुले प्राप्त गर्ने छन् ।
कम्पनीको हालको चुक्ता पूँजी २ अर्ब २६ करोड २८ लाख रुपैयाँ रहेको छ । प्रस्तावित १२.७० प्रतिशत अर्थात २८ करोड ७३ लाख रुपैयाँ बोनश शेयर वितरण पछि चुक्ता पूँजी २ अर्ब ५४ करोड रुपैयाँ पुग्ने छ । कम्पनीको एक्चुरियल मूल्याङ्कन बीमा समितिबाट स्वीकृत भइसकेको छ । उक्त मूल्याङ्कन स्वीकृत भए सँगै कम्पनीले बीमितले पाउने बोनशदर पनि घोषणा गरिसकेको छ ।
