काठमाडौं । विश्वभर महामारीको रुपमा फैलदै गरेको कोरोना (कोभिड–१९) को असर जीवन बीमामा नपर्ने भएको छ । जीवन बीमा कम्पनीहरुले कोरोना वा जुनसुकै कारणबाट बीमितको मृत्यु वा स्थायी अशक्त भएमा बीमा पोलिसी अनुसारको दावी भुक्तानी गर्ने जनाएका छन् ।
जीवन बीमक संघका अध्यक्ष शिवनाथ पाण्डेले इन्स्योरेन्स खवरसँग भने, ‘हामीले मृत्यु दावी भुक्तानीमा कुनै कारण राखेका छैनौं, कोरोना वा इबोला जुनसुकै महामारी वा अन्यबाट मृत्यु भएमा बिना शर्त दावी भुक्तानी गर्नेछौं । जीवन बीमा पोलिसी बचतमा आधारित पोलिसी भएकोले बचतकर्ताको रकममा जोखिम थप गरेर दिन समस्या नरहेको जीवन बीमा कम्पनीहरुको भनाई छ ।
यस्तै महाविपत्तिका लागि नै जीवन बीमा कम्पनीहरुले अर्बौ रुपैयाँको कोष खडा गरेका हुन्छन् । नेपालमा सञ्चालित १९ वटा जीवन बीमा कम्पनीले दुई खर्ब ६७ अर्बभन्दा बढि रकम कोषमा राखेका छन् ।
