काठमाडौं । आफ्नै सहकर्मीको आत्महत्याको घटनामा दुरुत्साहन गरेको आरोपमा प्रहरी हिराशतमा रहेका सञ्चारकर्मी रवि लामिछानेलाई जिल्ला अदालत चितवनले धरौटीमा रिहा गर्न आदेश दिएको छ ।
जिल्ला अदालत चितवन परिसरमा रहेका पत्रकार बिनोद त्रिपाठीले दिएको जानकारी अनुसार लामिछानेलाई अदालतले पाँच लाख रुपैयाँ धरौटीमा रिहा गर्न आदेश दिएको हो । न्यायाधिश हेमन्त रावलको इजलासले यस्तो आदेश दिएको हो । धरौटी बुझाएपछि मात्रै उनीहरु हिराशत मुक्त हुनेछन् । त्यसैगरी अर्का पत्रकार युवराज कँडेलसँग तीन लाख रुपैयाँ धरौटीमा गरिएको छ । त्यस्तै शालिकराम पुडासैनीको सम्बन्ध भएको भनिएकी अस्मिका कार्की (रुकु) भने सधारण तारेखमा रिहा भएकी छिन् ।
मुद्दाको अन्तिम फैसला नहुँदासम्म लामिछानेलाई विदेश जान नपाउने गरी प्रतिबन्ध लगाइएको छ । साथै आदेशमा सञ्चारकर्मी लामिछानेलाई पत्रकार पुडासैनीको आत्महत्याको घटनामा सम्बन्धमा कार्यक्रम निर्माण तथा प्रशारण नगर्न समेत आदेश दिएको छ ।
अदालतको आदेशसँगै लामिछानेले पाँच लाख रुपैयाँ धरौटी राखेर रिहा हुने प्रक्रिया सुरु गरिसकेका छन् ।
अधिवक्ता स्वागत नेपालले दिएको जानकारी अनुसार जिल्ला अदालत चितवनको इजलासले पत्रकार शालिकराम पुडासैनी मृत्यु प्रकरण आत्महत्या नै भएको ठहर गरेको छ । धरौटी मागसँगै लामिछानेमाथिको दुत्साहन मुद्दा केही बलियो बन्ने देखिएको छ ।
लामिछाने अहिलेलाई रिहा भएपनि पत्रकार पुडासैनीको आत्महत्या दुरुत्साहन अभियोगबाट सफाई पाउन भने बाँकी छ । आगामी दिनमा मुद्दा चल्दै गर्दा बाहिर नै बसेर उक्त मुद्दाको सामना गर्न पाउने छन् ।
न्यूज २४ बाट प्रशारण हुँदै आएको सिधा कुरामा काम गर्ने पत्रकार पुडासैनीले उक्त कार्यक्रम छोडेर माउन्टेन टिभीमा कार्यक्रम चलाउन थालेकै बेला २० साउनमा चितवनको एक होटलमा झुण्डिएको अवस्थामा भेटिएका थिए ।
