काठमाडौं । पछिल्लो समय अन्तर्राष्ट्रिय बजारमा चाँदीको मूल्य दैनिकजसो बढिरहेको छ।
पछिल्लो वर्षको अन्तरालमै अन्तर्राष्ट्रिय बजारमा चाँदीको भाउमा भारी वृद्धि भएको छ। अन्तर्राष्ट्रिय बजारमा प्रतिऔँस चाँदी ६३.०६ अमेरिकी डलर पुगेको छ।
नेपाली बजारमा आज पुस २ गते चाँदी प्रतितोला ४ हजार ५५ रुपैयाँमा कारोबार भएको छ। गत वैशाख २ गते चाँदी प्रतितोला १ हजार ९४५ रुपैयाँमा किनबेच भएको छ। यो हिसाबले पछिल्लो ८ महिनामा चाँदीको भाउ दोब्बर बढीले बढेको छ।
चाँदीको मूल्य लगातार बढ्नुमा विभिन्न कारण रहेका छन्। विज्ञहरुका अनुसार औद्योगिक मागमा निरन्तर वृद्धि, सुरक्षित सम्पत्तिमा लगानीकर्ताको बढ्दो चासो र विश्वव्यापी आर्थिक अनिश्चितताले चाँदीको मागलाई बढावा दिइरहेको छ।
विशेषगरी हरित ऊर्जा प्रविधि, विद्युतीय सवारीसाधन र सौर्य प्यानलमा चाँदीको बढ्दो मागले यो धातुलाई बलियो बनाएको छ। जसका कारण मूल्य लगातार बढिरहेको छ।
