काठमाडौं । सडक विभागले लोकसेवा उत्तीर्ण गरेका ९ जनालाई नियुक्ति लिन आउन ताकेता गरेको छ।
विभागले आज एक सूचना प्रकाशित गरी निजामती सेवा नियमावली, २०५० को नियम १६ बमोजिम स्थायी नियुक्ति लिन नआएका ती ९ जनालाई नियुक्ति लिन आउन ताकेता गरेको हो। उनीहरुलाई सोही नियमावलीको नियम १९ बमोजिम निरोगिताको प्रमाणपत्रसहित नियुक्ति लिन आउन विभागले सूचित गरेको छ।
नियमावलीमा भएको व्यवस्थाबमोजिम तोकिएको मितिभित्र नियुक्ति लिन नआए नियम १६ बमोजिम वैकल्पिक उम्मेदवारलाई योग्यताक्रमअनुसार नियुक्ति गरिने पनि विभागले स्पष्ट पारेको छ।
नेपाल इन्जिनियरिङ सेवा, सिभिल समूह, हाइवे उपसमूह, राजपत्र अनंकित प्रथम श्रेणी(प्रा) सबइन्जिनियर पदमा लोकसेवा आयोगले लिएको लिखित र मौखिक परीक्षामा नरेशजराज जोशी, बिकेन श्रेष्ठ, जितेन्द्रप्रकाश सिंह, जीवन रेग्मी, दिपक चौधरी, पवन धिताल, बालकृष्ण शिवाकोटी, सन्ध्या भुजेल र निकिता गौतम उत्तीर्ण भएका थिए। यी उम्मेदवार नियुक्ति लिन नआएपछि विभागले ताकेता गरेको हो।
