काठमाडौं । निजी क्षेत्रको हवाई सेवा प्रदायक बुद्ध एयरले आफ्नो एटीआर ४२ (नाइन एन एआईएन) विमानको मंगलबार बिदाइ गरेको छ। अब यो विमान बुद्ध एयरले नउडाउने भएको हो।
बुद्ध एयरले १६ वर्ष उडाएर उक्त विमानको बिदाइ गर्दै त्रिभुवन अन्तर्राष्ट्रिय विमानस्थलको ह्याङ्गरमा राखेको छ। बुद्ध एयरका कर्मचारीले विमानस्थलमा वाटर स्यालुटसहित विमानको बिदाइ गरेका थिए।
एटीआरको नियमअनुसार ७० हजार साइकल पूरा गरेपछि विमानको व्यावसायिक उडान गर्न पाइँदैन। सोही साइकल पूरा गरेकोले बुद्ध एयरले उक्त विमानको उडाउन बन्द गरेको हो।
बुद्ध एयरका अनुसार नेपालमा मात्र ४७ सिटे उक्त जहाजले ४० हजार साइकल उडान गरेको छ। नेपालमा सन् २००८ सेप्टेम्बर १७ मा यो विमानले माउन्टेन फ्लाइटबाट व्यावसायिक उडान सुरु गरेको थियो। विमानले आज अन्तिम माउन्टेन फ्लाइट गरेको छ।
यो विमान सन् १९९७ डिसेम्बर २८ बाट उड्न थालेको थियो।
