बीमा कम्पनीका सञ्चालकले आफनै बीमा कम्पनीमा आफैले बीमा गर्न नपाउँने समितिको व्यवस्था प्रति आक्रोश व्यक्त गरेका छन् ।
बुधबार सगरमाथा इन्स्योरेन्स कम्पनीको अनलाईन बीमा पोलिसी खरिद सेवाको शुभारम्भ गर्दै कम्पनीका अध्यक्ष आरके मानन्धरले आफनो कम्पनीमा आफैले बीमा गर्न नपाउँने भन्दै असन्तुष्ट व्यक्त गरेका हुन् ।
कार्यक्रममा बोल्दै अध्यक्ष मानन्धरले सञ्चालकले आफनै कम्पनीमा बीमा गर्न नपाउँने बीमा समितिको प्रावधान गलत भएको बताए । ‘बरु समितिले कडा निगरानी गर्न सक्छ । आर्थिक अनियमितता भए जरिवाना गर्न सक्छ । तर, यसरी ढोका नै बन्द भने गर्नु हुँदैन,’ उनले भने ।
त्यस्तै, नेपालको बीमा क्षेत्रले ठूलो फड्को मारेको बताए । छोटो अवधिमा नै बीमा क्षेत्र प्रविधिको युगमा प्रवेश गरेको छ । बीमा क्षेत्रको थप प्रगतिको लागि कम्पनीहरुले समयमा नै भुक्तानी गर्नुपर्ने उनले सुझाव दिए । ‘बीमा भनेको विपतको साथी हो । त्यस्तो अवस्थामा भुक्तानी गरेनौ भने कम्पनीको विश्वास गुम्छ,’उनले भने ।
