बीमा कम्पनीहरुले जथाभावी रुपमा तेस्रो पक्ष बीमा गर्न थाले पछि समितिको ध्यान खिचिएको छ । तेस्रो पक्ष बीमालाई नियन्त्रण गर्न समितिले गृहकार्य सुरु गरेको छ । यसको लागी पहिलो चरणमा समितिले कम्पनीहरुलाई नियम भित्र रहेर तेस्रो पक्ष बीमा गर्न निर्देशन दिएको छ ।
समितिले गत साता कम्पनीलाई परिपात्र जारी गर्दै तेस्रो पक्ष बीमा व्यवस्थित गर्न कम्पनीहरुसँग सुझाव मागेको छ । साथै समितिले जथाभावी काउण्टर खोलेर बीमा व्यवसाय नगर्न समेत निर्देशन दिएको छ । निर्देशन नमान्ने कम्पनीहरुलाई कारवाही समेत गरिने समितिले बताएको छ ।
सवारी साधनले अर्को पक्षलाई क्षति पुराएको खण्डमा हुने हानी नोक्सानीलाई कम गर्न गरिने बीमालाई तेस्रो पक्ष बीमा भनिन्छ । तेस्रो पक्ष बीमा सरकारले अनिवार्य गरेको छ । सडकमा सवारी साधन दुर्घटना हुँदा हुने क्षति कारण लामो समयसम्म सडक जाम हुने सर्वसाधारणले दुख पाउँने भएपछि सरकारले यस्तो जोखिमलाई कम गर्न तेस्रो पक्ष बीमा अनिवार्य गरेको हो ।
तर, बीमा कम्पनीहरुले जथाभावी तेस्रो पक्ष बीमा गर्ने गरेको पाईएको छ । तेस्रो पक्ष बीमा कुनै अभिकर्ताको व्यवस्था नभएपछि कम्पनीहरुले सवारी साधनका सोरुमहरुलाई १ देखि २ सय रुपैयाँसम्म कमिशन दिएर व्यवसाय लिने गरेका छन् । अझ प्रतिस्पर्धा हुँदा कम्पनीहरुले धेरै कमिशन दिएर बीमा व्यवसाय खोसा खोस गर्न थालेका छन् ।
त्यति मात्रै हैन, यातायात कार्यलय अगाडी कम्पनीहरुले माछा पसल जस्तै बीमालेख जारी गर्ने स्टल राखेका छन् । कम्पनीहरुले कर्मचारीहरुले ठेक्कामा राखेर तेस्रो पक्ष बीमा व्यवसाय गर्दै आएका छन् । कम्पनीहरुले तेस्रो बीमा व्यवसायमा जथाभावी गरेपछि समितिले कडाई गर्ने भएको हो ।
