काठमाडौं । विद्युत नियमन आयोगले बढाइएको विद्युत महसुल कार्यान्वयन नगर्न बुटवल पावर कम्पनीलाई निर्देशन दिएको छ।
आयोगले साउन २२ गतेको निर्णयबमोजिम बुटवल पावरको आँधीखोला विद्युत वितरण केन्द्रअन्तर्गतको बढाइएको विद्युत महसुल कार्यान्वयन नगर्न निर्देशन दिइएको हो। यसअघि आयोगको वैशाख २१ गतेको निर्णयबमोजिम कम्पनीले गत जेठ १ गते सूचना प्रकाशित गरी बढाइएको महसुल कार्यान्वयन गर्न लागिएको बारेमा जानकारी गराएको थियो।
उपभोक्ता समूहबाट विद्युत नियमन आयोग ऐन, २०७४ को दफा २२ बमोजिम महसुल पुनरावलोकन लागि निवेदन परेको थियो। त्यसैले बढाइएको महसुल पुनरावलोकन हुने भएकोले हाललाई वैशाख महिनामा प्रचलित महसुल नै कायम गर्न आयोगले कम्पनीलाई निर्देशन पनि दिएको छ।
