काठमाडौं । शेयर बजारमा आज साताको पहिलो दिन गतिलो बाउन्स आएको छ। बजार ४५ अंकले बढ्दा सबै उपसूचकमा हरियाली छाएको छ। यो दिन जीवन बीमा उपसमूह सर्वाधिक ४.४४ प्रतिशतले उकालो लागेको छ भने निर्जीवन बीममा उपसूचकमा पनि ३.६७ अंकको बढोत्तरी भएको छ। बजारमा चमक आउँदा २१४ वटा कम्पनीको शेयरभाउ बढेको छ भने २३ वटाको घटेको छ। ३ वटा कम्पनीको शेयरभाउ स्थिर रहेको छ।
बढेको बजारमा सर्वाधिक शेयरभाउ बढेका १० कम्पनीमध्ये ७ वटामा सकारात्मक सर्किट नै लागेको छ। छ्याङ्दी हाइड्रोपावर र भगवती हाइड्रोपावरको शेयरभाउमा १० प्रतिशत तथा विजय लघुवित्त, स्वरोजगार लघुवित्त, रावा इनर्जी, मैलुङ खोला जलविद्युत, सिंगटी हाइड्रोपावरको सेयरभाउमा १० प्रतिशतको हाराहारीमा बढेर सकारात्मक सर्किट लागेको हो। पञ्चकन्या माई हाइड्रोपावर, श्वेतगंगा हाइड्रोपावर र मितेरी डेभलपमेन्ट बैंकको शेयरभाउ पनि ९ प्रतिशत बढीले बढेको छ।
