काठमाडौं। मलेशियाको जीवन बीमक संघले बीमा अभिकर्तालाई दीर्घकालीनरुपमा टिकाउन चुनौतीको बारेमा अनुसन्धान शुरु गरेको छ।पूर्णकालीन व्यवसायीक अभिकर्ताको अभावमा जीवन बीमा व्यवसायको विस्तार चुनौतिपूर्ण हुने निष्कर्ष सहित संघले अभिकर्ताको पेशागत क्षमता अभिवृद्धिको लागि सन् २०२२ भर सघन तालिम समेत संचालन गर्ने घोषणा गरेको छ।
अनुसन्धानको क्रममा पेशाबाट बाहिरिनुको कारण, बीमा योजनाहरुबारेको ज्ञान र अभिकर्ताको निरन्तरता बीचको सम्बन्ध, भौगोलिक, आर्थिक, शैक्षिक विविधता र पेशागत निरन्तरताबीचको सम्बन्ध, कार्य अनुभव र कार्यस्थलमा प्राप्त हुने समर्थनको सम्बन्धबारे समेत अध्ययन केन्द्रित हुनेछ। अध्ययनबाट प्राप्त निष्कर्षको आधारमा अभिकर्ताको स्तर वृद्धि, दक्षता वृद्धि सम्बन्धमा विशेष अभियान संचालन गरिने संघले उल्लेख गरेको छ।
मलेशियामा सन् २०२० मा अभिकर्ता संख्या ८२ हजार ४२ रहेकोमा सन् २०२१ मा ८८ हजार ६८ पुगेको छ। अनुसन्धानको क्रममा अभौतिक माध्यमबाट सर्वेक्षण शुरु गरिएको छ। संघका अनुसार सर्वेक्षणको क्रममा ५ हजार अभिकर्तालाई सर्वेक्षण फारम भर्न लगाउने,२५० जनालाई टेलिफोन अन्तरवार्ता र केही समूहगत छलफलको आयोजना गरिनेछ।
