नेपाल बंगलादेश बैंकको ऋणपत्र भर्ने आज अन्तिम दिन रहेको छ । बैंकले जेठ १० गतेदेखि २० लाख युनिट (इकाई) ऋणपत्र खुला गरेको थियो । यसमध्ये सामूहिक लगानी कोषलाई ४० हजार युनिट छुट्याइएको छ भने ७ लाख ६० हजार युनिटमा सर्वसाधारणले आवेदन दिन सक्नेछन् । बाँकी १२ लाख युनिट भने बैंकले आफ्नै पहलमा अन्य संघ संस्थालाई बिक्री गर्नेछ ।
नेपाल बंगलादेश बैंकले ‘१० दशमलव २५ प्रतिशत एनबीबीएल डिबेन्चर २०८५’ नाममा ऋणपत्र जारी गरेको हो । उक्त ऋणपत्रमा वार्षिक १० दशमलव २५ प्रतिशत ब्याज पाइने छ । ऋणपत्र १० वर्षमा परिपक्क हुनेछ । ऋणपत्र निष्काशन तथा बिक्री प्रबन्धकमा नबिल इन्भेष्टमेन्ट बैंकिङ रहेको छ ।
लगानीकर्ताले प्रतियुनिट १ हजार रुपैयाँका दरले न्यूनतम २५ देखि अधिकतम १ लाख युनिटसम्म आवेदन दिन सक्नेछन् । यो ऋणपत्रलाई क्रेडिट रेटिङ एजेन्सी इक्रा नेपालले औसत जोखिम जनाउने ‘एलबीबीबी प्लस’ रेटिङ दिएको छ ।
ऋणपत्र बिक्रीबाट आएको रकममध्ये ७० प्रतिशत कर्जा लगानी, १० प्रतिशत लगानी, १० प्रतिशत शाखा विस्तार र १० प्रतिशत अन्य प्रयोजनका लागि उपयोग हुनेछ ।
नेपाल बंगलादेश बैंकको सबै शाखा र सी–आस्वाको माध्यमबाट यसमा आवेदन दिन सकिनेछ । नबिल इन्भेष्टमेन्ट बैंकिङ नक्साल, काठमाडौंबाट पनि फारम भर्न पाइनेछ ।
