काठमाडौं। दोर्दी खोला जलविद्युत कम्पनीले प्राथमिक शेयर निष्काशनका लागि इस्युअर रेटिङ गरेको छ। इक्रा नेपालले गरेको रेटिङ अनुसार कम्पनीले समयमा वित्तीय दायित्व पुरा नगरेको खण्डमा मध्यम किसिमको जोखिमको संकेत गर्ने ‘इक्राएनपि आर डबल बि माइनस’ प्राप्त गरेको छ।
कम्पनीले लमजुङ जिल्लामा १२ मेगावाट क्षमताको दोर्दी एक हाइड्रोइलेक्ट्रिक प्रोजेक्ट निर्माण गरिरहेको छ। उक्त आयोजनाको प्रतिमेगावाट लागत १९ करोड २० लाख रुपैयाँ लाग्ने अनुमान गरिएको छ। आयोजनाको निर्माण कार्य ८५ प्रतिशत भन्दा बढि सकिएको छ। निर्माण कार्य सकिन अझै केहि समय लाग्ने भएकाले लागत थप बढ्न सक्ने रेटिङ एजेन्सीले जनाएको छ।
आयोजनाको निर्माणका लागि ७० प्रतिशत ऋण र ३० प्रतिशत शेयर पुँजीबाट जुटाउने योजना रहेको छ। शेयर पुँजी मध्ये संस्थापक शेयरधनीहरुले ७५ करोड ९० लाख रुपैयाँ चुक्ता गरिसकेका छन्। कम्पनीको प्रमुख शेयरधनीहरुमा राधी विद्युत कम्पनीको २१.७६ प्रतिशत, अरुण गौतमको २.०६ प्रतिशत, लमजुङ इनर्जी डेभलपमेन्टको १.५९ प्रतिशत, सिइडिवी हाइड्रोपावर डेभलपमेन्टको १.५८ प्रतिशत र पशुपति शमशेरको १.३२ प्रतिशत लगानी रहेको छ। आयोजनाको जम्मा लागत २ अर्ब २९ करोड रुपैयाँ लाग्ने अनुमान गरिएको छ। कम्पनीले इस्युअर रेटिङ सँगै एक अर्ब ६२ करोड रुपैयाँ ऋणको पनि रेटिङ गराएको छ।
