काठमाडौं । भारतीय शेयर बजार नियामक सेबी एक टेलिभिजन प्रस्तोता र टेक्निकल एनालिस्ट (टीए)लाई ५ वर्षका लागि शेयर कारोबार रोक लगाएको छ। यसका साथै उनीहरुलाई जनही भारु १ करोड जरिवाना गरिएको छ।
सेबीले बिजनेस च्यालन सीएनबीसी आवाजका पूर्वएंकर प्रदीप पण्ड्या र च्यानसँग आबद्ध टीए अल्पेश वासनजी फुरियामाथि उक्त कारबाही गरेको हो। योसँगै सेबीले अन्य ६ वटा संस्थाहरुलाई पनि भारु १०–१० लाख जरिवाना गरेको छ। पण्डयाले सीएनबीसी आवाजमा काम गर्दा फुरियालाई कम्पनीहरुको गोप्य सूचनाबारे जानकारी गराएका थिए। त्यही गोप्य सूचनाको फाइदा उठाउँदै फुरियाले आफ्नो आफूसँग जोडिएका अन्य व्यक्तिहरुको बैंक अकाउन्टबाट शेयर कारोबार गरेको सेबीको ठहर छ।
सार्वजनिक रुपमा प्रसारित हुनुअघि नै पण्डयाले कम्पनीहरुको गोप्य सूचना चुहाउने गरेको सेबीको अनुसन्धानबाट पत्ता लागेको थियो। यस्ता किसिमका गतिविधिले व्यक्तिगत फाइदालाई बढावा दिन मद्दत पुगेको सेबीको भनाइ छ। सेबीले यसलाई क्लासिकल फ्रन्ट–रनिङ केस भनेको छ।
यस किसिमको गतिविधिले नैतिकताको मानकहरु उल्लंघन गरेको सेबीले जनाएको छ। ‘यसले शेयर बजारको डायनमिक्समा असार पार्छ’, सेबीले भनेको छ, ‘यसबाट केही मानिसलाई अनुचित लाभ पुग्छ। यस्तो अवस्थामा बजारप्रति अन्य लगानीकर्ताको विश्वास गुम्न सक्छ ।’
