कोरोना भाइरसको कारणले गर्दा विश्वकै सबै भन्दा ठूलो पुनर्बीमा कम्पनी स्वीस री लाई २०२० को प्रथम त्रैमासमा ठूलो नोक्सानी भएको छ।
कम्पनीले प्रकाशित गरेको वर्ष २०२० को प्रथम त्रैमासको वित्तिय विवरण अनुसार कम्पनी २२५ मिलियन अमेरिकी डलर घाटामा रहेको छ। गत वर्ष प्रथम त्रैमासमा कम्पनीले ४२९ मिलियन अमेरिकी डलर खुद मुनाफा गरेको थियो ।
कम्पनी घाटामा गएपनि कम्पनीको बीमा शुल्क आर्जन भने वृद्धि भएको छ। बीमा शुल्क आम्दानी वृद्धि हुँदै ९५८६ मिलियन अमेरिकी डलर पुगेको छ । जुन १ वर्ष अघिको तुलनामा ७ दशमलव ४ प्रतिशत धेरै हो।
स्वीस री ग्रुप विश्वकै ठूलो पुनर्बीमा कम्पनी हो। सन् १८६३ मा स्थापना भएको यस कम्पनीको प्रधान कार्यालय स्विजरल्याण्डमा रहेको छ र विश्वभर यस कम्पनीका ८० कार्यालय छन्।
