काठमाडौं । प्रधानमन्त्री केपी शर्मा ओलीले कृषि बीमाबापतको भुक्तानी गर्न ८० करोड रुपैयाँ नेपाली बीमा प्राधिकरणको खातामा पठाइएको बताएका छन्।
प्रतिनिधिसभाको हिउँदे अधिवेशनको पहिलो बैठकलाई सम्बोधन गर्दै प्रधानमन्त्री ओलीले कृषि बीमाबापतको भुक्तानी पठाइएको जानकारी गराएका हुन्। ‘कृषिबाली तथा पशुधन बीमामा समावेश भएका हजारौँ किसानको बीमाबापतको भुक्तानी गर्न ८० करोड रुपैयाँ बीमा प्राधिकरणको खातामा पठाइएको छ’, उनले भने।
यसैगरी धेरै समयदेखि ३५ जिल्लाका १५ लाखभन्दा बढी दुग्ध किसानलाई सरकार बनेको १०० दिनभित्र भुक्तानी दिएको पनि ओलीले जानकारी दिए। ‘करिब ७५ हजार उखु किसान, जसले वर्षौंदेखि आफ्नो पसिनाको मूल्य पाउन सकेका थिएनन्, उनीहरुले पनि आफ्नो अनुदानबापतको भुक्तानी पाइसकेका छन्’, उनले भने।
प्रधानमन्त्री ओलीले निर्माण व्यवसायीको कानुनसम्मत रुपमा सिर्जना भएको तर भुक्तानी नभएको विगत आर्थिक वर्षदेखिको ३० अर्ब रुपैयाँको दायित्व फरफारक गरेको पनि बताए। ‘अर्थतन्त्रमा नगद प्रवाह गर्न सरकार बन्नेबित्तिकै लामो समयदेखि भुक्तानी नदिने सरकारी रवैयालाई गर्यो’, उनले भने।
