काठमाडौं । आन्तरिक राजस्व विभागले चालु आर्थिक वर्षको आयकरको पहिलो किस्ताबापतको रकम बुझाउन ताकेता गरेको छ।
विभागले आज एक सूचना प्रकाशित गर्दै यस्तो ताकेता गरेको हो। चालु आर्थिक वर्षको कारोबारको अनुमानित करको विवरण र सो विवरणअनुसारको तिर्नुपर्ने आयकरको पहलो किस्ताबापतको ४० प्रतिशतले हुन आउने रकम यही पुस मसान्तभित्र बुझाउन विभागले सूचित गरेको छ।
उक्त रकम ठूला करदाता कार्यालय, मध्यमस्तरीय करदाता कार्यालय, सम्बन्धित आन्तरिक राजस्व कार्यालय वा सम्बन्धित करदाता सेवा कार्यालयमा दाखिला गर्न सकिने विभागले जनाएको छ।
