काठमाडौं । गत साउन ३१ गते शेयर बजारमा दैनिक कारोबारले नयाँ रेकर्ड बनाएको थियो। यो दिन बजारमा २९ अर्ब ९५ करोड ८५ लाख रुपैयाँ बढीको कारोबार भएको छ। जुन नेपालको इतिहासमै उच्च हो।
गत साउन ३१ गते बजार पनि बढेर ३०००.८१ हजारको विन्दु नाघेको थियो। त्यसपछि भने बजार फेरि ओरालो लागिरहेको छ।
आज बजार ५३.६३ अंकले घटेर २६९५.९३ को विन्दुमा झरेको छ। कारोबार पनि साढे १० अर्ब रुपैयाँमा खुम्चिएको छ। गत साउन ३१ गतेको तुलनामा नेप्से परिसूचक १०.१६ प्रतिशतले घटेको छ। अर्थात बजारले ३०४.८८ अंक गुमाइसकेको छ।
पछिल्लो ८ कारोबार दिनमा ३०० भन्दा बढी अंक गुमाएको नेप्सेको फ्लोट मार्केट क्यापिटलाइजेसन आज घटेर १५ खर्ब ८ अर्ब ३९ करोड २२ लाख रुपैयाँमा झरेको छ। गत साउन ३१ गते फ्लोट मार्केट क्यापिटलाइजेसन १६ खर्ब ८० अर्ब १६ करोड १९ लाख रुपैयाँ थियो। यस हिसाबले लगानीकर्ताको सम्पत्ति १ खर्ब ७१ अर्ब ७६ करोड ९७ लाख रुपैयाँ गुमाएका छन्।
