काठमाडौं । राजनीतिक किचलोबीच सत्ता गठबन्धन भत्किएको छ। राष्ट्रियसभा अध्यक्ष र मन्त्रिपरिषद पुनर्गठनको विषयमा कुरा नमिल्दा नेपाली कांग्रेस नेतृत्व सत्ता गठबन्धन भत्किएको हो।
सत्ता गठबन्धन भत्काउँदा नेकपा माओवादी केन्द्रले नेकपा एमाले, राष्ट्रिय स्वतन्त्र पार्टी (रास्वपा), जनता समाजवादी पार्टी (जसपा) र राष्ट्रिय प्रजातन्त्र पार्टी (राप्रपा)लाई समेटेर नयाँ सत्ता समीकरण बनाउन सहमति भएको छ।
प्रधानमन्त्री पुष्पकमल दाहाल ‘प्रचण्ड’ले अहिलेका मन्त्रीहरुलाई हटाएर आजै सानो आकारको मन्त्रिपरिषद् गठन गर्ने तयारी गरेको स्रोतले बतायो। ‘सम्भवतः नयाँ सत्ता समीकरणमा सहभागी हुने दलहरुबाट एक–एक जना मन्त्री बनाउने योजनामा प्रचण्ड छन्’, उनले भने।
रास्वपाबाट सभापति रवि लामिछानेले मन्त्रिपरिषद्मा सहभागी हुने विषयमा निर्णय गर्नेछन्। एमालेले प्रमुख सचेतक पदम गिरीलाई सरकारमा पठाउने निर्णय गरेको छ।
