काठमाडौं । अमेरिकी दूतावासले भिसा नियमहरुसम्बन्धी नयाँ निर्देशिका जारी गरेको छ। जसअन्तर्गत अब विद्यार्थी भिसाका लागि आवेदन दिनेहरुले आफ्नो सामाजिक सञ्जाल खाताहरुका बारेमा जानकारी प्रदान गर्नुपर्नेछ।
भारतस्थित अमेरिकी दूतावासले आवेदकहरुलाई विगत ५ वर्षमा प्रयोग गरिएका सबै सामाजिक सञ्जाल प्रयोगकर्ता नाम र ह्यान्डलहरु साझा गर्न आग्रह गरेको छ। यसले चेतावनी पनि दिएको छ कि त्यसो गर्न असफल भएमा भिसा आवेदन रद्द हुन सक्छ।
सामाजिक सञ्जाल जाँच भनेको के हो ?
सामाजिक सञ्जाल जाँच गर्नु भनेको भिसा आवेदकको अनलाइन गतिविधिको गहन समीक्षा गर्नु हो। जसले गर्दा उनीहरु अमेरिका प्रवेश गर्न योग्य छन् वा छैनन् भनेर निर्धारण गर्न सकिन्छ। सामाजिक सञ्जालमा फेसबुक, एक्स, लिंक्डइन र टिकटकजस्ता प्लेटफर्म समावेश छन्।
यो कदमलाई ट्रम्प प्रशासनको नीतिको एक भागको रुपमा लिइँदैछ। जसअन्तर्गत अन्तर्राष्ट्रिय विद्यार्थीहरुमाथि निगरानी र नियन्त्रण कडा पारिएको छ। विशेषगरी अमेरिकी विश्वविद्यालयहरुमा प्यालेस्टाइन समर्थक विरोध प्रदर्शनमा वृद्धि भएपछि ट्रम्प प्रशासनले अझ कडा कदम चाल्न थालेको छ।
एफ, एम र जे भिसा के हुन् ?
एफ भिसा मुख्यतया विश्वविद्यालय, कलेज र अन्य शैक्षिक संस्थाहरुमा भर्ना भएका विद्यार्थीहरुका लागि हो।
एम भिसा प्राविधिक वा व्यावसायिक विद्यालयहरुमा अध्ययन गर्ने गैरशैक्षिक विद्यार्थीहरुका लागि हो।
अर्कोतर्फ जे भिसा ती आगन्तुकहरुलाई दिइन्छ, जसले मान्यता प्राप्त सांस्कृतिक वा शैक्षिक आदानप्रदान कार्यक्रममा भाग लिन्छन्।
सामाजिक सञ्जालमा मानिसहरु के भनिरहेका छन् ?
यस निर्णयका बारेमा सामाजिक सञ्जालमा धेरै प्रतिक्रिया आएका छन्। राजनीतिक वैज्ञानिक तथा लेखक इयान ब्रेमरले लेखे, ‘अब अमेरिकामा विद्यार्थी भिसा (एफ, एम र जे श्रेणी) का लागि आवेदन दिनेहरुका लागि आफ्ना सबै सामाजिक सञ्जाल प्रोफाइलहरु ‘सार्वजनिक’ बनाउनु अनिवार्य गरिएको छ।’
अमेरिकी अधिकारीहरुले यो अतिरिक्त जाँच प्रक्रियाको एक हिस्सा भएको बताएका छन्। जसको उद्देश्य ‘अमेरिकाको राष्ट्रिय सुरक्षामा खतरा’ निम्त्याउन सक्ने त्यस्ता आवेदकहरुलाई पहिचान गर्नु हो।
एक प्रयोगकर्ताले व्यंग्यात्मक रुपमा लेखे, ‘अब अमेरिकामा रहेका अन्तर्राष्ट्रिय विद्यार्थीहरुको सामाजिक सञ्जाल पोस्टहरु उनीहरुको भिसा आवेदन स्वीकृत गर्न जाँच गरिनेछ। यो विश्वास गरिन्छ कि चाँडै पर्यटकहरुले पनि उही नियम पालना गर्नुपर्ने हुन सक्छ। यस्तो अवस्थामा, यस्तो देखिन्छ कि म चाँडै अमेरिका यात्रा गर्न सक्षम हुने छैन।’
अर्को प्रयोगकर्ताले लेखे, ‘चाहे यो अमेरिकी भिसा आवेदन होस् वा कुनै विश्वव्यापी अवसर, तपाइँको सामाजिक सञ्जाल अब तपाइँको डिजिटल बायोडाटा बनेको छ। केवल एक खोजको साथ तपाइँले अनलाइन पोस्ट गर्ने सबै कुरा तपाइँको पहिचानको हिस्सा बन्छ। त्यसैले तपाइँको प्रोफाइललाई तपाइँको भविष्यको कथा बताउने बनाउनुहोस्, यसलाई रोक्ने होइन।’
अर्को प्रतिक्रियामा प्रश्न गरिएको थियो, ‘के अमेरिकी भिसा प्रक्रियाको क्रममा सामाजिक सञ्जाल खाताहरु जाँच गर्नु साँच्चै सुरक्षा उद्देश्यका लागि हो वा यो केवल डाटा माइनिङको माध्यम हो ? के अब सम्पूर्ण प्रणाली केवल डाटा संकलन र निगरानीको खेल मात्र हो ?’ –बीबीसीबाट भावानुवादित
