काठमाडौं । अवैध आप्रवासीविरुद्ध निरन्तर कडा कारबाही गरिरहेको अमेरिकी डोनाल्ड ट्रम्प प्रशासनले नयाँ योजना सुरु गरेको छ। यसअन्तर्गत अमेरिकामा अवैध रुपमा बसोबास गर्ने आप्रवासीलाई स्वेच्छाले देश छोड्न एक हजार डलर दिइनेछ।
यो ट्रम्प प्रशासनको अडानमा ठूलो परिवर्तन हो। जसले अहिलेसम्म आप्रवासीलाई हत्कडी लगाएर देश निकाला गर्दै आएको थियो। यसको उद्देश्य आप्रवासीको डर कम गर्नु र उनीहरुलाई स्वेच्छिक रुपमा देश फर्किन प्रोत्साहित गर्नु रहेको छ।
अमेरिकी सरकारले हालैका महिनामा अवैध आप्रवासीलाई देश निकाला गर्न धेरै पैसा खर्च गर्नुपरेको छ र विश्वभरबाट आलोचना पनि भोग्नुपरेको छ। यस्तो अवस्थामा ट्रम्प सरकार अवैध आप्रवासी आफैँ अमेरिका छोड्न चाहन्छ।
अमेरिकी गृह सुरक्षा विभाग (डीएसएस)ले यदि अवैध आप्रवासीले सीमा शुल्क र सीमा सुरक्षा (सीबीपी होम) एप प्रयोग गरेर सरकारलाई फर्किन चाहेको जानकारी दिए भने उनीहरुलाई देश छोड्न मद्दत गरिनेछ। यसले उनीहरुलाई आर्थिक सहयोग प्रदान गर्दै देशबाहिर पठाउन अनुमति दिनेछ। नजरबन्द र निर्वासनबाट बच्नेछ।
होमल्यान्ड सेक्युरिटी सेक्रेटरी क्रिस्टी नोएमले भनिन्, ‘यदि कोही अमेरिकामा अवैध रुपमा छ भने यो उनीहरुका लागि अमेरिका छोड्ने सबैभन्दा राम्रो र सुरक्षित तरिका हो।’
एपमा दिनुपर्नेछ जानकारी
डीएचएसले आफ्नो विज्ञप्तिमा भनेको छ, ‘सीबीपी होम एपमार्फत अवैध आप्रवासीलाई आफ्नो देश फर्किन आर्थिक र यात्रा सहायता प्राप्त गर्ने ठूलो अवसर छ। यदि कुनै अवैध विदेशीले फर्कन सीबीपी होम एप प्रयोग गर्छ भने उसले १ हजार डलर (करिब १ लाख ३५ हजार रुपैयाँ) भत्ता पाउनेछ।
यो एप प्रयोग गरेर स्व–निर्वासनले भत्ताको लागत भए पनि देश निकालाको लागत लगभग ७० प्रतिशतले घटाउने विश्वास गरिएको छ। हाल अवैध आप्रवासीलाई पक्राउ गर्न हिरासतमा राख्न र देश निकाला गर्न औसत लागत १७ हजार १२१ डलर छ। यस्तो अवस्थामा आप्रवासी पठाउनु ट्रम्पका लागि धेरै महँगो साबित भएको छ।
ट्रम्पको नीतिमाथि प्रश्न
राष्ट्रपति ट्रम्पले सत्तामा आएपछि अवैध आप्रवासीमाथि कडाइ देखाएका छन्। ट्रम्पले अवैध आप्रवासनसम्बन्धी आफ्नो नीतिको प्रशंसा गरेका छन्। यद्यपि ब्रुकिंग्स इन्स्टिच्युसनले ट्रम्प प्रशासन यस मुद्दामा आफ्नो लक्ष्य हासिल गर्न असफल भएको दाबी गरेको छ। देश निकालाको संख्या सामान्य छ तर यसको प्रभाव विनाशकारी रहेको छ। यस्तो अवस्थामा अब उनले अवैध आप्रवासीलाई आर्थिक सहयोग दिएर फिर्ता पठाउने विकल्प रोजेका छन्। –एजेन्सी
