काठमाडौं । ट्रम्प प्रशासनले नयाँ अमेरिकी ग्रीन कार्ड (आप्रवासन) नीति सम्बन्धी आप्रवासी चिन्ताहरु कम गर्ने प्रयास गरेको छ।
अमेरिकाको गृह सुरक्षा विभाग (डीएचएस)ले स्पष्ट पारेको छ कि अधिकांश ग्रीन कार्ड आवेदकले उनीहरुको स्थायी बसोबास (ग्रीन कार्ड) आवेदनहरुको समीक्षा भइरहेको बेला अमेरिका छोड्न आवश्यक पर्ने छैन। यो स्पष्टीकरण अमेरिकी नागरिकता र आप्रवासन सेवा (यूएससीआईएस) ले स्थायी बसोबास खोज्नेहरुलाई प्रोसेसका क्रममा आफ्नो देश फर्किन आवश्यक पर्ने जनाएको एक हप्तापछि आएको हो। जसमा असाधारण परिस्थितिहरुमा छुट दिइनेछ। यो घोषणाले आप्रवासीहरुमा चिन्ता बढायो कि उनीहरुले अब आफ्नो देश फर्किनुपर्नेछ र उनीहरुको ग्रीन कार्ड आवेदनहरु प्रोसेस भइरहेको बेला त्यहाँ पर्खनुपर्नेछ।
ट्रम्पको नयाँ ग्रीन कार्ड नीतिको अमेरिकी सांसदहरु र आप्रवासन अधिवक्ताहरुले कडा आलोचना गरेका थिए। उनीहरुले यसलाई ‘लापरवाह र गलत’ बताए। डेमोक्र्याटिक सांसदहरुले एसएससीआईएसको यो ‘निन्दनीय’ निर्णयसँग लड्ने र यसलाई उल्टाउन हरसम्भव प्रयास गर्ने बताए।
गत शुक्रबार डीएचएसले नीतिमा कुनै ठूलो परिवर्तन नभएको भन्दै यस विषयमा स्पष्टीकरण दिए। न्युयोर्क टाइम्समा प्रकाशित खबरअनुसार आप्रवासन अधिकारीहरुसँग लामो समयदेखि केस–दर–केस आधारमा निर्णय गर्ने अधिकार रहेको छ कि आवेदकले ग्रीन कार्ड प्रक्रियाको क्रममा अमेरिका छोड्नुपर्छ कि पर्दैन।
डीएचएसका प्रवक्ताले यी पछिल्ला निर्देशनहरु अवस्थित नियमहरुको सम्झना हुन् र सबै आवेदकहरुका लागि आवश्यकता नरहेको बताए। विभागले स्थायी बसोबास वा ग्रीन कार्ड खोज्ने अधिकांश मानिसहरुलाई उनीहरुको प्रोसेस हुँदासम्म देशमा रहन अनुमति दिइने जनाएको छ।
अधिकारीहरुका अनुसार भिसा ओभरस्टे वा अन्य आप्रवासन चिन्ताजस्ता केही कारकले व्यक्तिगत केस निर्णयहरुलाई असर गर्न सक्छन्। यद्यपि, डीएचएसले को प्रभावित हुन सक्छ भन्ने बारे विवरण प्रदान गरेन।
