काठमाडौं । अमेरिको राष्ट्रपति डोनाल्ड ट्रम्प निर्वाचित भएसँगै र उनको ट्यारिफ घोषणाले विश्वभरका शेयर बजार हालै उल्लेखनीय रुपमा घटेका छन्। यसका कारण यस वर्ष विश्वका शीर्ष ९ धनी व्यक्तिहरुको कुल सम्पत्ति लगभग ४०० अर्ब डलरले घटेको छ।
सबैभन्दा ठूलो धक्का संसारकै सबैभन्दा धनी व्यक्ति एलन मस्कले महसुस गरेका छन्। ब्लुमबर्ग बिलियनेयर्स इन्डेक्सका अनुसार यस वर्ष उनको कुल सम्पत्ति १३५ अर्ब डलरले घटेको छ। उनको कुल सम्पत्ति अहिले २९८ अर्ब डलर पुगेको छ। सोमबार उनको कम्पनी टेस्लाको शेयरमा गिरावट आएको छ, जसले गर्दा मस्कको कुल सम्पत्ति ४.३९ अर्ब डलरले घटेको छ।
मस्कले टेस्लाबाहेक एक्स र स्पेसएक्सजस्ता धेरै कम्पनी चलाउँछन्। एक्सलाई पहिले ट्विटरको रुपमा चिनिन्थ्यो।
यस वर्ष अमेजनका संस्थापक जेफ बेजोस, ल्यारी एलिसन र माइकल डेलको कुल सम्पत्ति ३५ देखि ४५ अर्ब डलरले घटेको छ। त्यस्तै फेसबुकको मूल कम्पनी मेटाका मार्क जुकरबर्ग, माइक्रोसफ्टका स्टिभ बाल्मर, ल्यारी पेज र सर्गेई ब्रिनको संयुक्त कुल सम्पत्ति ११० अर्ब डलरभन्दा बढीले घटेको छ। बिल गेट्सको कुल सम्पत्ति पनि ९ अर्ब डलरभन्दा बढीले घटेको छ। एनभिडियाका संस्थापक जेन्सन हुआङले २८.५ अर्ब डलर गुमाए।
यस वर्ष कमाउने शीर्ष १० मा रहेका एक मात्र अर्बपति वारेन बफेट हुन्। जसको कुल सम्पत्ति ११.५ अर्ब डलरले बढेको छ।
