काठमाडौं । थाइल्यान्डको राष्ट्रिय विपद् बीमा योजना सरकारको ‘जनताका लागि विपद् बीमा परियोजना’अन्तर्गत आफ्नो पहिलो परीक्षणबाट गुज्रिरहेको छ।
गत अक्टोबर ५ मा भारी वर्षापछि लाम्फुन प्रान्तमा अचानक बाढी र चियाङ माई प्रान्तमा तीव्र हावाका कारण यो परीक्षण सञ्चालन भइरहेको हो। सरकारी पहलअन्तर्गत देशभरका ३ करोड परिवारका लागि बीमा कभरेज अक्टोबर १ मा सुरु भएको थियो।
थाइल्यान्डको बीमा नियामक बीमा आयोगको कार्यालय (ओआईसी)को एक विज्ञप्तिअनुसार विपद्का कारण घर र कृषि भूमिमा व्यापक क्षति पुगेको छ र मृत्युको खबर पनि आएको छ। देश अझै पनि राष्ट्रिय विपद् बीमा योजना लागू गर्ने प्रारम्भिक चरणमा रहेकोले लाम्फुन प्रान्तले प्रमाणहरु प्रमाणित गर्न र संकलन गर्न दिशानिर्देशहरु विकास गर्न ओआईसीसँग काम गरिरहेको छ। दाबी प्रक्रियालाई छिटो बनाउन अनलाइन प्रक्रिया पनि विकास भइरहेको छ।
थाइल्यान्डको राष्ट्रिय विपद् बीमा योजनाले मानिसहरुलाई उनीहरुको अधिकार, कभरेज र दाबी प्रक्रियाका बारेमा सचेत गराउन सक्रिय रुपमा जानकारी प्रवर्द्धन गरिरहेको छ। –एजेन्सी
