काठमाडौं । दक्षिण कोरियामा एक व्यक्ति जानी–जानी आफ्नै औँला काटेर बीमाको करोडौँ रकम झ्वाम पारेको घटना बाहिर आएको छ।
कोरियाको इन्चोनबाट प्रहरीले ५० वर्षीय एक व्यक्तिलाई पक्राउ गरेपछि यो घटना बाहिर आएको हो। ती व्यक्तिले बीमाको करोडौँ रकम हडप्न आफ्नै औँला काटेको प्रहरी अनुसन्धानबाट खुलेको छ।
इन्चोन पश्चिमी प्रहरीचौकीले १३ तारिखमा ती व्यक्तिलाई पक्राउ गरिएको बारेमा जानकारी गराएको हो। प्रहरीले ती व्यक्तिमाथि बीमा ठगी रोकथाम विशेष ऐन, औद्योगिक दुर्घटना क्षतिपूर्ति बीमा ऐन र अन्य कानुन उल्लंघन गरेको आरोपमा मुद्दा चलाएको छ।
सन् २०२४ जुनदेखि २०२५ मार्चसम्म इन्चोनस्थित कार्यालयमा ती व्यक्तिले आफ्ना चारवटा औँला धेरै पटक काटेको प्रहरीको आशंका छ। उनले निजी बीमा कम्पनी र कोरिया श्रमिक क्षतिपूर्ति तथा कल्याण सेवाबाट बीमा भुक्तानी धोखाधडीपूर्वक दाबी गरे र २५ करोड वोन हिनामिना गरेका थिए।
गुप्तचरका आधारमा प्रहरीले ती व्यक्तिको बीमा दाबी रेकर्डहरुको अनुसन्धान गरेको थियो। अनुसन्धानका क्रममा चोटपटक जानाजानी गरेको खुलेको प्रहरीले जनाएको छ।
प्रहरीले ती व्यक्तिमाथि थप अनुसन्धान गरिरहेको छ। यद्यपि ती व्यक्तिको नाम र ठेगाना भने प्रहरीले सार्वजनिक गरेको छैन। –एजेन्सी
