काठमाडौं । काठमाडौंको नागार्जुन नगरपालिका–२ सानोभर्याङस्थित एउटा डेराबाट अवैध नगद, सुनजस्तो गहना, इलेक्ट्रोनिक्स उपकरण र एउटा कारसहित एक चिनियाँ नागरिक र नेपाली महिला पक्राउ परेका छन्। यो पक्राउ नेपालमा बढ्दो अन्तर्राष्ट्रिय वित्तीय अपराध र शंकास्पद कारोबारको सञ्जालमा चिनियाँ नागरिकको संलग्नता दोहोरिएको पछिल्लो घटना हो।
गत मंगलबार राति ११ः३० बजे जिल्ला प्रहरी कार्यालय काठमाडौंको टोलीले छापा मार्दा ३८ वर्षीय चिनियाँ नागरिक सियाओ ग्याङ र २२ वर्षीया नेपाली महिला रोजिना सुनारलाई नियन्त्रणमा लियो। उनीहरु सानोभर्याङस्थित सरिता महर्जनको भाडाको फ्ल्याटमा बस्दै आएका थिए।
प्रहरीले फ्ल्याटबाट ६९ लाख ८० हजार रुपैयाँ नगद, चार थान आइफोन, एउटा म्याकबुक र अन्य मोबाइल सेट, दुईवटा सुनको हार, दुई जोडी झुम्का, चारवटा चुरा, तीनवटा औँठी, एउटा नथ, र टाउकोका लागि प्रयोग हुने गहनाजस्तो वस्तुका साथै एउटा बीवाईडी ब्रान्डको कार बरामद गरेको छ।
प्रहरीका अनुसार, बरामद नगदको स्रोत र अन्य सामग्रीको वास्तविक पहिचानका लागि अनुसन्धान केन्द्रित गरिएको छ। पक्राउ परेका दुवैजनालाई स्वयम्भु प्रहरी प्रभागको नियन्त्रणमा राखी सोधपुछ भइरहेको छ। सोही फ्ल्याटमा बस्ने अन्य चारजना महिलालाई पनि सोधपुछका लागि हिरासतमा लिइएको प्रहरी स्रोतले जनाएको छ।
बरामद गरिएका इलेक्ट्रोनिक्स उपकरणको डिजिटल फरेन्सिक परीक्षण भइरहेको छ। जसबाट उनीहरुको संलग्नता अन्तर्राष्ट्रिय सञ्जालमा छ वा छैन भन्ने थप प्रमाण खुल्ने अपेक्षा गरिएको छ। यस प्रकारका घटनामा अवैध कारोबार, मनी लाउन्डरिङ र साइबर अपराधको सम्भावना पनि जोडिएको हुनसक्ने भन्दै प्रहरीले अनुसन्धानलाई गहिरो बनाएको छ।
काठमाडौंमा पछिल्लो तीन महिनामा मात्रै चिनियाँ नागरिकहरु अवैध नगद, सुन, र विद्युतीय सामानको कारोबारमा संलग्न भएका कैयौँ घटना सार्वजनिक भएका छन्। यसले नेपालमा अन्तर्राष्ट्रिय वित्तीय अपराधको सञ्जाल बढ्दै गएको र यसको नियन्त्रणका लागि राजस्व अनुसन्धान विभाग, एन्टी मनी लाउन्डरिङ युनिट र प्रहरीबीच थप समन्वय आवश्यक रहेको देखाएको छ।
अनुसन्धानपछि दोषी ठहरिए पक्राउ परेका व्यक्तिहरुलाई सम्पत्ति शुद्धीकरण वा अन्य सम्बन्धित कानुनअन्तर्गत कारबाही अगाडि बढाइने प्रहरीले जनाएको छ।
