काठमाडौं । सोसल मिडिया प्लेटफर्म ‘एक्स’ युजरले सोमबार लगातार समस्या व्यहोर्नुपरेको थियो। एक्स सोमबार लगातार ३ पटक बन्द भएको थियो।
एक्समा साइबर अट्याक भएको खुलासा भएको छ। जसका कारण एक्सको सबै सेवा ठप्प भएको थियो।
एक्स प्लेटफर्मका मालिक एलन मस्कले एक्समा लेख्दै साइबर अट्याक भएको स्पष्ट पारेका छन्। ‘यो हमलामा कुनै समूह वा देशको संलग्न हुन सक्छ’, मस्कले लेखेका छन्।
एक्समा लगातार हमला भइरहे पनि पछिल्लोपटकको हमलामा थुप्रै संसाधनको प्रयोग भएको मस्कको दाबी छ। ‘हमला गर्नेहरुका विषयमा अनुसन्धान भइरहेको छ’, मस्कले भनेका छन्।
विश्वकै धनीव्यक्ति मस्कले ट्विटर सन् २०२२ मा खरिद गरेका थिए। त्यसपछि उनले यो सोसल मिडिया प्लेटफर्मको नाम ‘एक्स’ राखेका थिए। –एजेन्सी
