क्यानडाले आफ्नो अध्यागमन प्रणालीमा ठूलो परिवर्तन गर्ने तयारी गरिरहेको छ। जसले उच्च तलब दिने जागिरमा काम गर्नेहरुका लागि स्थायी बसोबास (पीआर) को बाटो सजिलो बनाउन सक्छ। यो परिवर्तन एक्सप्रेस एन्ट्री प्रणालीअन्तर्गत लागू गरिएको सीआरएस (बृहत् श्रेणीकरण प्रणाली) मा गर्न सकिन्छ।
क्यानडाको अध्यागमन विभागअन्तर्गतको अध्यागमन, शरणार्थी र नागरिकता क्यानडा (आईआरसीसी)ले नयाँ ‘हाई वेज अकुपेसन फ्याक्टर’मा विचार गरिरहेको छ। जसले उम्मेदवारहरुलाई उनीहरुको जागिरको तलब स्तरका आधारमा अतिरिक्त अंक प्रदान गर्नेछ। यसको अर्थ उमेर, शिक्षा र भाषामात्र नभएर अब जागिरको आयस्तरले पनि छनोट प्रक्रियामा महत्वपूर्ण भूमिका खेल्न सक्छ।
प्रस्तावअनुसार क्यानाडाको राष्ट्रिय औसत ज्यालाको १.३ गुणा, १.५ गुणा वा २ गुणा बढी तिर्ने जागिरहरुले लाभ उठाउनेछन्। तलब वर्ग जति उच्च हुन्छ, उम्मेदवारले त्यति नै बढी सीआरएस अंक प्राप्त गर्न सक्छ। यी अंक व्यक्तिगत तलबमा नभएर जागिर वर्ग र यसको औसत तलब स्तरमा आधारित हुनेछन्।
यो परिवर्तनले पहिले नै उच्च आय मानिने पेसाहरुमा सबैभन्दा ठूलो प्रभाव पार्न सक्छ। डाक्टर, शल्यचिकित्सक, वरिष्ठ सरकारी अधिकारी र वरिष्ठ व्यवस्थापन पदहरु दुई गुणा तलब श्रेणीमा पर्न सक्छन्। इन्जिनियर, साइबर सुरक्षा विशेषज्ञ, शिक्षक र अन्य कुशल पेसा १.५ गुणा तलब श्रेणीमा पर्न सक्छन्। थप रुपमा केही वित्तीय र प्राविधिक ट्रेडहरु १.३ गुणा तलब श्रेणीमा पर्न सक्छन्।
यद्यपि, यी जागिरको कुनै आधिकारिक सूची अहिलेसम्म जारी गरिएको छैन। यी केवल अनुमानित तथ्यांकमा आधारित सम्भावित उदाहरणहरु हुन्। जुन क्यानाडाको तलब तथ्यांक र एनओसी कोड प्रणालीका आधारमा संकलित गरिएको छ।
क्यानडा सरकारको विश्वास छ कि उच्च कमाइ क्षमता भएका व्यक्तिहरुले क्यानडा आइपुगेपछि आर्थिक रुपमा राम्रो प्रदर्शन गर्छन् र देशको अर्थतन्त्रमा बढी योगदान पुर्याउँछन्। त्यसैले यो नयाँ कारकलाई विचार गरिँदैछ।
हाल यो सम्पूर्ण परिवर्तन प्रस्ताव चरणमा छ र जनता र विज्ञहरुबाट खोजिएको छ। अर्को १२ देखि १८ महिनामा अन्तिम निर्णय अपेक्षित छ। यद्यपि, केही तत्वहरु पहिले नै लागू हुन सक्छन्।
यदि लागू गरियो भने क्यानाडाको पीआर प्रणाली ‘उच्च–आय भएका दक्ष कामदारहरु’ तिर उल्लेखनीय रुपमा झुक्न सक्छ। जसले एक्सप्रेस एन्ट्रीका लागि प्रतिस्पर्धालाई पनि परिवर्तन गर्नेछ।
