काठमाडौं । माइक्रोसफ्टका सहसंस्थापक बिल गेट्सले ठूलो घोषणा गरेका छन्। उनले आफ्नो सम्पत्तिको धेरै सानो हिस्सा आफ्ना छोराछोरीलाई दिने बताएका छन्।
इथियोपियाको आदिस अबाबामा रहेको अफ्रिकी संघको मुख्यालयमा बोल्दै बिल गेट्सले यस्तो घोषणा गरेका हुन्। उनले अफ्रिकाको स्वास्थ्य र शिक्षा सुधार गर्न धेरैजसो सम्पत्ति खर्च गर्ने बताएका छन्। ‘मेरो प्रयासले अफ्रिकाका जनतालाई प्रगति गर्न र सबै देशमा समृद्धि ल्याउन मद्दत गर्नेछ’, उनले भने। यो काम आगामी २० वर्षमा गरिने उनको भनाइ थियो।
ब्लुमबर्ग बिलेनियर्स इन्डेक्सका अनुसार बिल गेट्सको कुल सम्पत्ति हाल १७५ अर्ब डलर छ। उनी विश्वका पाँचौँ धनी व्यक्ति हुन्। आगामी २० वर्षमा अर्थात् २०४५ सम्ममा उनको कुल सम्पत्ति २०० अर्ब डलर हुने विश्वास गरिएको छ।
यस्तो अवस्थामा बिल गेट्सले कुल सम्पत्तिको १ प्रतिशतमात्र आफ्ना छोराछोरीलाई दिने निर्णय गरेका छन्। बाँकी ९९ प्रतिशत सम्पत्ति दान गरिनेछ। अर्थात्, बिल गेट्सले आगामी २० वर्षमा अफ्रिकालाई १९८ अर्ब डलर दिने योजना बनाएका छन्।
गेट्सले अफ्रिकी संघको मुख्यालयमा उपस्थित १२ हजार अधिकारी, कूटनीतिज्ञ र युवालाई भने, ‘मैले हालै निर्णय गरेको छु कि मेरो धेरैजसो सम्पत्ति आगामी २० वर्षमा दान गरिनेछ। यो रकमको धेरैजसो अफ्रिकाले सामना गरिरहेका समस्याहरु पार गर्न मद्दत गर्नेछ।’
गेट्सले राम्रो स्वास्थ्य र शिक्षालाई विकासको आधारका रुपमा वर्णन गरे। उनले भने, ‘स्वास्थ्य र शिक्षामार्फत मानिसको क्षमता बढाएर अफ्रिकाको प्रत्येक देश प्रगतिको बाटोमा अगाडि बढ्न सक्छ। यो बाटोको हिस्सा बन्न पाउनु धेरै रोमाञ्चक छ।’
गेट्सको संस्था बिल एन्ड मेलिन्डा गेट्स फाउन्डेसनले प्राथमिक स्वास्थ्य सेवामा ध्यान केन्द्रित गर्नेछ। विशेषगरी उनको जोड आमा र बच्चाको स्वास्थ्य सुधारमा हुनेछ। गेट्सले भने, ‘हामीले सिकेका छौँ कि यदि आमा गर्भावस्था अघि र गर्भावस्थाको समयमा स्वस्थ छिन् र राम्रो पोषण पाउँछिन् भने यसले धेरै राम्रो परिणाम दिन्छ।’ उनले शिशुहरुको पहिलो ४ वर्षमा राम्रो पोषण पाउनु उनीहरुको भविष्यका लागि धेरै महत्त्वपूर्ण हुने बताए।
बिल गेट्सले सन् १९७५ मा पल एलेनसँग मिलेर माइक्रोसफ्ट स्थापना गरेका थिए। कम्पनी चाँडै सफ्टवेयर उद्योगमा एउटा प्रमुख शक्ति बन्यो। वर्षौंपछि गेट्सले विस्तारै आफूलाई कम्पनीको दैनिक कामकाजबाट टाढा राखे। उनले सन् २००० मा सीईओ र सन् २०१४ मा अध्यक्षको पद त्याग गरे। आज उनी प्रायः परोपकारी काममा ध्यान केन्द्रित गर्छन् तर अझै पनि माइक्रोसफ्टको सल्लाहकारका रुपमा काम गर्छन्। –एजेन्सी
