काठमाडौं । बंगलादेशको बीमा क्षेत्र नियामक बीमा विकास र नियामक प्राधिकरण (आईडीआरए)मा अध्यक्ष र सदस्यहरुको नियुक्तिका लागि उमेर हद आधिकारिक रुपमा हटाइएको छ।
बंगलादेशी सरकारले हालै राजपत्र सूचना प्रकाशित गर्दै आईडीआरएमा अध्यक्ष र सदस्यको नियुक्तिका लागि उमेर हद हटाएको हो। गत अप्रिल २३ मा बीमा विकास र नियामक प्राधिकरण (संशोधन) ऐन, २०२६ को मस्यौदालाई सरकारले स्वीकृत गरेपछि यो निर्णय गरिएको हो।
विशेषगरी नियुक्ति मापदण्डको सम्बन्धमा संशोधनले विद्यमान बीमा विकास र नियामक प्राधिकरण ऐन, २०१० मा परिवर्तन ल्याउँछ। पहिले अध्यक्ष र सदस्यको नियुक्तिका लागि अधिकतम उमेर हद ६७ वर्ष तोकिएको थियो। पछिल्लो संशोधनसँगै यो प्रावधान हटाइएको छ। योसँगै ती पदका लागि माथिल्लो उमेर हद समाप्त भएको छ।
यो परिवर्तनले बंगलादेशी सरकारले उमेरको सीमा बिना नियामकको शीर्ष पदहरुमा योग्य र अनुभवी व्यक्तिलाई नियुक्त गर्न अनुमति दिनेछ। –एजेन्सी
