काठमाडौं । सरकारले मनसुनसँगै बाढी पहिरोको जोखिमलाइ मध्यनजर गर्दै उच्च जोखिमयुक्त क्षेत्रहरूमा रात्रीकालीन सवारी साधन चलाउन प्रतिबन्धको घोषणा गरेको छ।
कार्यवाहक प्रधानमन्त्री प्रकाशमान सिंहको अध्यक्षतामा बसेको राष्ट्रिय विपद् जोखिम न्यूनीकरण तथा व्यवस्थापन परिषद्को बैठकले आइतबार यस्तो निर्णय गरेको हो। परिषद्ले यो मनसुनमा विपदविरूद्धको पूर्व तयारी बढाउन र सार्वजनिक सुरक्षा सुनिश्चित गर्ने बृहद् रणनीतिको एक हिस्सा भएको बताएको छ।
परिषद्ले भारी वर्षाको समयमा जोखिममा रहेका क्षेत्रका बासिन्दाहरूलाई सचेत गराउन र आवश्यक सावधानी अपनाउन प्रोत्साहित गर्न सम्बन्धित निकायहरूलाई पनि निर्देशन दिएको छ।
बैठकले कालीगण्डकी करिडोरमा रात्रिकालीन सवारी साधन चलाउन प्रतिबन्ध लगाएको छ ।
जोखिमग्रस्त क्षेत्रहरूमा रात्रिकालीन सवारी साधन चलाउन प्रतिबन्धको अतिरिक्त, परिषद्ले विपद् प्रभावित क्षेत्रहरूमा तत्काल रिपोर्टिङ र उद्धार व्यवस्था गर्न आह्वान गरेको छ। विपद् व्यवस्थापनका लागि जिम्मेवार निकायहरूलाई उच्च सतर्कतामा रहन र घटनाहरू हुँदा ढिलाई नगरी प्रतिक्रिया टोलीहरू तैनाथ गर्न निर्देशन दिइएको छ।
बैठकमा गृहमन्त्री रमेश लेखकले तीनै राष्ट्रिय सुरक्षा बलहरूलाई उच्च सतर्कतामा राख्दै सम्भावित उद्धार कार्यका लागि नेपाली सेना र निजी क्षेत्र दुबैको हेलिकप्टर पनि तयारी अवस्थामा राखिएको दाबी गरे।
मौसम पूर्वानुमानको आधारमा उच्च जोखिमको रूपमा पहिचान गरिएका सडकहरूमा सवारी साधन आवतजावत बन्द गर्न स्थानीय अधिकारीलाई पहिले नै निर्देशन दिएको छ।
बैठकमा गृहमन्त्रीले चेतावनीपूर्ण शैलीमा भने, यदि यो निर्देशन उल्लङ्घन गरियो भने, कुनै पनि परिणामस्वरूप हुने घटनाहरूको लागि प्रमुख जिल्ला अधिकारी र अन्तिम चौकीका प्रहरी प्रमुख जवाफदेही हुनेछन्।
सरकारले बाढी पहिरोका सम्बन्धमा सर्वसाधारणमा सूचना पुर्याउन एसएमएस, रेडियो टेलिभिजनका माध्यमको प्रयोग गर्ने भएको छ। साथै विपदविरूद्ध सुरक्षा तयारी गर्न सर्वसाधारणमा सचेतना फैलाउने अभियान समेत सञ्चालन गर्ने भएको छ।
