काठमाडौं । कम्पनी बेचेपछि अमेरिकाको लुइसियानामा रहेको पारिवारिक व्यवसाय फाइबरबन्डका सीईओ ग्राहम वाकरले एउटा निर्णय गरे। यो निर्णयको चर्चा अहिले विश्वभर भइरहेको छ।
वाकरले बिक्रीबाट प्राप्त रकमको १५ प्रतिशत लगभग अमेरिकी डलर २४० मिलियन (३४ अर्ब ५६ करोड रुपैयाँ बढी) सीधै आफ्ना ५४० पूर्णकालीन कर्मचारीलाई बाँडेका छन्। उल्लेखनीय कुरा के छ भने ती कर्मचारीको कम्पनीमा कुनै शेयर थिएन।
फाइबरबन्ड अमेरिकी विशाल ईटनलाई बेचिएको थियो। सम्झौताका क्रममा वाकरले स्पष्ट रुपमा आफ्ना कर्मचारीहरुले बिक्री रकमको हिस्सा पाउने कुरा तोकेका थिए। यो जानकारी वाल स्ट्रिट जर्नलको रिपोर्टमा खुलासा गरिएको थियो।
वाकरका अनुसार कम्पनीको कठिन समयमा कर्मचारीहरुले देखाएको बफादारीको सम्मानमा यो निर्णय लिइएको थियो। बोनस रकम अचम्मलाग्दो थियो। औसतमा प्रत्येक कर्मचारीले लगभग ४ लाख ४३ हजार डलर (लगभग ६ करोड ३७ लाख रुपैयाँ) बोनस प्राप्त गरे। यदि कर्मचारीहरु कम्पनीमा रहे भने यो रकम एकैचोटि नदिएर ५ वर्षभित्र दिइनेछ। बोनस भुक्तानी सन् २०२५ जुनबाट सुरु भइसकेको छ।
धेरै कर्मचारीले सुरुमा यो सत्य हो भनेर विश्वास गरेनन्। कसैलाई यो ठट्टा हो जस्तो लाग्यो। वाकर आफैँले स्वीकार गरे कि केही कर्मचारीले बोनस प्राप्त गर्नेबित्तिकै खर्च गरे। उनको शब्दमा आखिर यो उनीहरुको पैसा हो र निर्णय उनीहरुकै हो।
फाइबरबन्डको कथा संघर्ष र पुनरागमनको रहेको छ। यो कम्पनी सन् १९८२ मा ग्राहमका बुवा क्लाउड वाकरले स्थापना गरेका थिए। सन् १९९८ मा कारखानामा आगलागी भयो। तैपनि कर्मचारीहरुको तलब रोकिएन। डट–कम बबलको समयमा कर्मचारी कटौती भयो तर ग्राहम र उनका भाइले पछि ऋण चुक्ता गर्दै कम्पनीको जिम्मा लिए र नयाँ डिभिजन सुरु गरे। जसले गर्दा बिक्रीमा ४०० प्रतिशत वृद्धि भयो। यो कदमलाई सामाजिक सञ्जालमा सबैभन्दा सकारात्मक क्रिसमस समाचारमध्ये एकका रुपमा स्वागत गरिएको छ।
