काठमाडौं । राजधानी काठमाडौँ उपत्यकामा शुक्रबार एकै दिन थप ५४१ जनामा कोरोना भाइरसको संक्रमण पुष्टि भएको छ । स्वास्थ्य मन्त्रालयका अनुसार गत २४ घण्टामा काठमाडौं जिल्लामा ४०२, भक्तपुर जिल्लामा ३४ र ललितपुर जिल्लामा १०५ जना कोरोना पुष्टि भएको छ ।
यसैगरी देशभर ३१० संक्रमितको आईसीयु र ५० संक्रमितको भेन्टिलेटरमा उपचार भइरहेको छ । पछिल्ला केही दिनहरुमा कोरोना भाइरसको संक्रमण घटिरहेको तथ्याङ्कले देखाएको छ । साथै पछिल्ला दिनहरुमा पिसिआर परिक्षण समेत निकै कम हुँदै गएको छ ।
